“Despues di 25 aña  den sektor finansiero mi ta sali di mi zona di konfortabilidat. Den bo zona di konfortabilidat nada mas ta krese”, Thomas Domhoff ta sali otro siman pa Brasil pa e enfrentá otro reto. Un reto sumamente interesante kaminda e lo ta CEO di un kompania agrario/produktor di diferente kuminda na Castrolanda.

E reto....

Thomas Domhoff, un yu di Kòrsou ta bai liderá un empresa grandi na Brasil ku mas di 65 aña di eksistensia.

Un empresa ku mas di 3000 empleado, 15 unidat di produkshon di entre otro lechi, manteka, yoghurt, karni di baka, porko i karné, batata i chips, bonchi, broccoli, micro brewery di serbes, maishi i soya ku un ‘omzet’ di Naf 1.500 mion (pues 1.5 bion)

Di lechi Castrolanda tambe ta produsí Nino/Nido pa Nestlé, di karni porko Castrolanda ta produsí e marka Alegra ku ta e di 5 mas grandi na Brasil (ta mata 8 mil porko pa dia).

Kolonia fundá pa ulandesnan...

Brasil tin diferente produktor di entre otro lechi. Mayoria di e produktonan di lechi aki a bin di Ulanda. Un parti di Castrolanda ku ta Castro ta un kolonia fundá pa imigrantenan ulandes entre 1951 i 1954. Su ekonomia ta basá riba produkshon agrikultura i produkshon di lechi kual ta un di esnan mas importante den e region ku ta keda konsiderá e produktor mas grandi di lechi na Brasil. Tambe e tin un produkshon grandi di bonchi, soya i grano. Tambe e ta un di e kooperativanan agrikultura di mas grandi na Brazil ku ta karga e nòmber di e siudat aki ku ta Castrolanda kaminda Thomas Domhoff ta bai traha komo CEO.

23 aña den eksterior, bèk na Kòrsou...

Thomas Domhoff na 1994 a kuminsá traha pa Ing bank,  despues ABN i Rabo Banko.  Tambe el a traha pa Citco na Irlanda. Trahando na Rabobank na Ulanda a presentá e posibilidat pa e bai representá e akshonnan di e grupo aki den banko na Brasil. Den prinsipio tabata intenshon pa Thomas keda Brasil 3 aña, pero di einan el a bira 5 aña i despues atrobe 6 luna aserka. Di einan manera el a konta Djasabra, huntu ku su kasá a disidí ku nan ta bai Kòrsou bèk.

Thomas a bin Kòrsou ku un espektativa, ku su 23 aña di eksperensia e tempu ei, e kier a hasi hopi. “Un kos ma ripará na Kòrsou, esun ku ke traha i tin eksperensia, tin trabou i hopi proyekto na Kòrsou”. Esun ku ke traha tin hopi trabou i bo eksperensia ta keda rekonosé. Thomas no a ripara niun klase di arogansia i tampoko el a sinti ku ta pasobra el a bin di afó kier a push’é afó.

Espektativanan surpasá....

Pero todo lo kontrario; Su espektativanan a keda surpasá i tambe loke el  gana aki tabata bon. Loke si el a haña un lástima ta e aktitut ku el a topa na Kòrsou. Thomas a ripará ku hende ta mira tur tipo di trabou kolaborativo komo un tabú. Ta manera saka hende for di nan konfortabilidat. Traha ku hende riba tópikonan nobo i kambionan tabata trese hopi resistensia. I esei a hasi Thomas un tiki tristu. Papiando ku otro hendenan ku tabatin mesun eksperensia kuné. Hendenan ku tin e mesun frustrashon ku e tabatin, el a mira ku tin un situashon den nos komunidat di hendenan inteligensia a bin hiba Thomas Domhoff riba e kaminda di Bitcoin. Ta trata aki di un plataforma masha poderoso, i el a atkerí un konosementu amplio di dje.

Orcogroup...

Den esun aña ku Thomas tin na Kòrsou, el a traha pa Orcogroup; e grupo aki ta doño di Orcobank i Aruba Bank. El a traha riba diferente proyekto di inovashon pa e grupo.

Tambe el a traha pa CIFC, prinsipalmente pa promové Kòrsou pafó. CIFC ta un plataforma masha bon, pero ku a sufri un poko debí na e kambionan di gobièrnu di último aña. I pa kolmo awor e plataforma tin un reto su dilanti. E plataforma aki ta promové Kòrsou komo un isla ku ta papia diferente idioma i bon den Offshore, pero e aña aki Offshore ta kaba i ta e pregunta kiko lo bai promové Kòrsou kuné den 2019.

Sali for di mi zona....

“Despues di 25 aña  den sektor finansiero mi ta sali di mi zona di konfortabilidat. Den bo zona di konfortabilidat nada mas ta krese. Mi ta sali for di dje i mi ta masha rashonal, mi a pensa ku futuro ta den teknologia i den agro. Populashon na mundu ta kresiendo i tur hende mester di ko'i kome. Mi gusta i mi ta komprondé teknologia i awor mi ta drenta teknologia, kon ta traha kumindá”, Thomas Domhoff a splika. ‘E empresa aki ta trahando pa kita antibiótika kompleto for di karni. Tambe nan no ta kere den manipulashon genétiko. Tur kos nan ke krusa, e matanan segun e manera di ántes i nan ta usando teknologia’.

Kòrsou no a rechasá mi...

‘Mi no ta sinti ku Kòrsou a rechasá mi pero e ta un kos úniko pa mi. E ta algu úniko pa mi. Mi ta sali di sektor bankario pa agrario pero loke nan mester ta hende pa reorganisá i strukturá e empresa i wak e posishon stratégiko di aki 20 aña” Thomas a bisa relashoná ku su puesto nobo na Brasil. E lugá yama Castrolanda. Ta ulandesnan ku a establesé un kolonia ulandes banda di esun Castro. I loke e ulandesnan tabata sa ta lechi i nan a sigui amplia i bai den kuminda pa nan bakanan, bonchi, batata i a diversifiká 15 produkto. Na Brasil makamba ta dominá lechi, flor i kosnan manera chukulati. I nan ta papia poko ulandes ainda. Ta un reto familiar i negoshi. Ta un siudat chikitu kaminda tin kas ku kura habri estilo Merka. ‘Mi yunan lo bai Prins Willem Alexanderschool i lo haña ulandes komo vak’, Thomas a bisa ku un sonrisa di orguyo riba su kara. I e modelo di e skol ta di Finlandia, kaminda e mucha ta siña i hunga pa loke el a kaba di siña drenta su kabes i despues bai siña atrobe i hunga bèk.

Lo envolví Kòrsou...

Pa Thomas ta un reto pa e por strukturá un kompania di mas di 3 mil trahadó. E reto ta hopi grandi i e espektativanan mas grandi ainda. I Thomas tin hopi idea ta kana kuné entre otro pa envolví su trabou ku Kòrsou. Por ehèmpel el a pensa den hiba hóbennan stazje na e kompania ei.

‘Si mi duna hende chèns di pensa argonómiko, nan por bin Kòrsou i traha algu asina’.

El a terminá bisando ‘Unda ku mi bai mi ta promové Kòrsou. E biaha aki mi ta bai ku mi kòpi di Kòrsou. E biaha aki mi ta CEO i ta mas fásil pa mi proponé pa trese hende di Kòrsou i mi por hasi muchu mas pa Kòrsou”.