A hasi palabrashon ku supermerkadonan i agensianan funerario pa mihó kontròl

WILLEMSTAD.-Den e seshon di informashon ku dr. Izzy Gerstenbluth a duna awe na nòmber di gobièrnu di Kòrsou a anunsiá ku Kòrsou tin un di 4 persona infektá ku e vírus di Corona. Ta trata di e persona ku for di último dianan ku su tèst tabata inkonklusivo. Awor si a haña resultado ku e ta positivo. Ta dos tèst den unu, den promé instante un tèst a sali positivo i e otro a sali negativo. Awor si tur dos a sali positivo. Ayera a bolbe tèst i ámbos a sali positivo. Importante pa menshoná ku tur e personanan ku a tèst positivo ta hendenan ku a keda infektá den eksterior.

Un di dos aspekto importante ta den kombersashon ku agensianan funerario a palabra ku un máksimo di 50 hende por bai entiero i ta bai kontrolá pa evitá pa no forma aglomerashon ni den sala ni pafó. Esei ta konta pa santana tambe. E durashon di entiero por dura máksimo di un ora i mei. Pa loke ta trata supermerkadonan tambe a hasi palabrashon ku ta bai kontrolá pa evitá muchu hende den supermerkado i ta pidi sosten di tur hende pa tene distansia. Ta pidi pa un hende di famia so bai supermerkado pa asina duna espasio na otro hendenan. Supermerkadonan a enfatisá ku no ta nesesario pa “hamster” na Kòrsou. Aki tur supermerkado tin nan depósito djis patras di e supermerkado. Pues no ta nesesario.