WILLEMSTAD. - Den un karta ku a yega redakshon di EXTRA for di un prezu aki na Kòrsou, ta indiká ku tin un otro prezu ku ta sitando kastigu largu, su ròl di kriminal a kambia bira informante di hustisia.

E karta ta hasi menshon di vários kaso ku e prezu/informante aki ta metí aden, pero ku no ta keda investigá, pa e echo ku e ta koperando ku hustisia.

E ta inkriminando hendenan inosente, segun e karta di e prezu i forma problema entre di e gang nan grandi aki na Kòrsou.

Ta trata di un prezu ku den pasado a yega di hui i a keda kondená na kastigu severo ounke ku e tabata prófugo. A logra gara e prezu aki, despues di hopi aña.

Pa motibunan di seguridat a ser’é na Ulanda, pero aparentemente a tres’é Kòrsou pa e sigui ku e ròl nobo ku e tin komo informante di Hustisia.

Su nòmber ta keda menshoná den kasonan di tiroteo na entre otro Hato, pero nunka e persiguié pa e kaso aki, segun  e prezu.

Awor aki e tin un forma kon e ta kue konfiansa di e otro prezunan i asina usa nan informashon pa pasa esaki pa hustisia.

E karta ta hasi menshon ku el a mata su mes primu i despues a paga ‘matonnan’ pa mata un otro persona, pero no a logra.

Tin asta menshon ku el a trata di saka informashon for di prezunan será den kaso asesinato Helmin Wiels, pero e no ta logrando su meta.

Awor ku kosnan a bira kayente aki na Kòrsou, a bolbe mand’é Ulanda.

E loke ku e prezu ta bisa den su karta ta ku tin pruebanan konvisente den vários kaso mas kontra e prezu/informante aki ta aden, pero no ta hasi nada ku esaki.