WILLEMSTAD.- Ku regularidat diferente persona ta benta eiskast, fòrnu, shushi di kas, muebelnan kibra, bestia morto, restunan di material di konstrukshon, matras i hopi otro tipo di shushi tur kaminda kant’e Weg naar Bullenbaai. Esaki ta sosodé apesar ku e landfill ta den serkania i ku den hopi kaso depositá shushi aya ta grátis.

Aparentemente, limpia e lugánan aki no ta ser konsiderá komo un tarea di gobièrnu. Kada biaha e trabou di limpiesa ta keda den man di personanan ku ta sinti nan mes hopi irritá pa e situashon.

Na entrada di Sint Michiel, den serkania di e saliñanan kaminda frekuentemente tin un grupo grandi di flamingo i kaminda hopi bishitante ta bin, hende a benta un kantidat enorme di kosnan di kas, mesklá ku asfalt, betòn, pida glas, mosaiko i kadaver di bestia.

Na kuminsamentu di òktober a start ku un operashon grandi di limpiesa den e área aki. E organisashonnan Stichting Uniek Curaçao, Stichting Mi Refugio i Pura Vida Azul a traha durante mas ku un siman pa limpia e lugánan kaminda hende a benta shushi ilegalmente.

Dia 15 di òktober e trabounan di limpiesa a finalisá. Próksimamente lo instalá bòrchinan nobo pa indiká ku mester mantené e área limpi.

Tur hende por yuda pa prevení ku ta sigui benta shushi ilegalmente.

Hendenan por kontribuí aktivamente dor di apelá na esnan ku ta shushi nos naturalesa pa hiba nan shushi na landfill.

Si bo laga un persona limpia restunan di konstrukshon na bo kas òf empresa, òf hasi trabou di limpiesa den bo kurá, sera un akuerdo ku un parti di e pago lo tuma lugá solamente despues ku e persona por mustra un komprobante di Selikor ku el a depositá e shushi na landfill.

Sostené mantenshon di nos naturalesa

Personanan ku ke kontribuí finansieramente na mantenshon general di áreanan natural i lugánan popular na Kòrsou por depositá nan donashon riba kuenta di MCB 87218007, na nòmber di Stichting Uniek Curaçao.