WILLEMSTAD.- Relashoná ku henter e situashon di COVID-19 ku tin riba nos isla, gerensia di prizòn tin ku informá komunidat ku a konstatá un di 3 kaso positivo bou di e klientenan, di kual segun prosedura a keda trasladá pa e área di isolashon.

Ta trata aki di un kliente ku tabata enkarselá na Barber i a keda transportá pa SDKK pa asina bai den e departamento di FOBA. Na momentu ku a bai tèst e detenido a resultá ku e ta positivo.

Apesar di e situashon aki i pa sigui mantené e kuido di klientenan i e personal di prizòn, Gerensia di prizòn ta keda rekordá diariamente pa keda mantené na e reglanan vigente i alabes a pone material i produktonan di higiena disponibel. Tur kliente di SDKK a risibí tapa boka (Mondkapje) den kuadro di protekshon personal.

Informashon inkorekto sirkulando

Resientemente gerensia di prizòn, a tuma nota di un informashon no korekto ku ta sirkulá den medionan di komunikashon riba ret nan sosial relashoná ku e situashon COVID-19 den prizòn. Gerensia di prizòn tin ku informá ku tin atenshon debidamente pa ku e situashon di COVID-19 i gerensia ta tuma esaki na serio. Gerensia ta traha estriktamente konforme prosedura i rekomendashon ku gobièrnu di Kòrsou a stipulá i alabes gerensia di prizòn kier a gradisí kada personal di SDKK ku ta dunando nan aporte den kuadro di COVID -19 diariamente.

Mas aleu gerensia di prizòn a deliniá su maneho for di momentu ku e promé kaso a ser konstatá na mart 2020 den nos komunidat. E personal di SDKK i klientenan a sigui e maneho aki kual por tabata orguyoso ku no tabatin ningun kaso positivo den e instituto.

Na final gerensia di prizòn kier a partisipá ku e trayekto pa bakunashon na Sentro di detenshon i korekshon Kòrsou a kuminsá, i den dianan binidero lo duna informashon tokante e trayekto aki na tur klientenan i personal di SDKK.