WILLEMSTAD - Ministerio di Tráfiko, Transporte i Planifikashon Urbano, den kolaborashon ku Stichting Willemstad Parkeer Beheer, ta anunsiá ku parkermentu pagá lo bolbe keda introdusí den sentro di Willemstad, tantu den Punda komo Otrobanda. E tarifa lo keda meskos, ku ta 1 florin pa ora, i despues 50 sèn pa kada mei ora adishonal. For di 15 di òktober 2024, lo inisiá ku meternan di parker na lugá nan stratégiko pa optimalisá e maneho di parkermentu i mehorá e aksesibilidat di e sentro di siudat pa bishitante.

Preparashon

Aktualmente, parkeermeter ta instalá den Punda i Otrobanda komo preparashon pa e introdushon di parkermentu paga. E trabou akí lo kla pa yega na e fecha di 15 di òktober, pa e sistema nobo por ta operashonal na tempu. Bishitante di sentro lo por uzá e meter di parker direktamente riba e dia di introdukshon pa paga e tempu di parker. Parkermentu pagá ta ofresé diferente benefisio pa bishitante di e sentro:

– Disponibilidat di lugá pa parkermentu ta mas mihó: Ku un maneho di parkermentu mas efisiente, nos ta spera ku lo por tin sufisiente espasio pa parkermentu pa bishitante.

– Distansia kòrtiku pa yega na tienda i atrakshon: E meternan di parker ta instalá stratégikamente pa ta fásil pa bishitante pa parker i tin akseso direktamente na e área di tienda i atrakshon.

– Spar tempu: Bishitante lo por haña un lugá pa parkermentu fásil i paga lihé, loke ta kontribuí na un eksperensia di kompra mas agradabel.

Lo duna informashon kla tokante uzo di e meternan di parker, tarifa i reglanan di parkermentu, pa asina tur hende ta bon informá tokante kon i unda por paga. Tambe lo introdusí un app pa telefòn selular pa por hasi pago.

Mira riba futuro

Ministerio di Tráfiko, Transporte i Planifikashon Ubano ta sigui traha pa un sentro di siudat mas organisá i konfortabel pa biba. “Nos ta konvensí ku e sistema nobo akí lo kontribuí na mehorá fluho di tráfiko, pero tambe na un eksperensia mas agradabel pa bishitante di nos bunita sentro di siudat.”