WILLEMSTAD.- For di dos aña pasá, na aña 2019, funshonarionan di Xteam a kuminsá prepará doñonan di trùk di pan riba reglanan ku nan  mester tene nan mes na dje i konsekuensianan pa ku esaki.

Na vários okashon a pone fecha final kaminda lo kuminsá aktua, pero kada bes a posponé esaki. Ultimo biaha ku a posponé, a pone esaki pa dia 31 di  mart próksimo komo fecha definitivo. Pues bou di ningun sirkunstansia esaki lo no kambia.

Ayera un biaha mas e funshonarionan di MEO a sali kaya i a kuminsá pasa serka e trùknan di pan pa kòrda nan riba tur e medidanan ku nan mester tene nan mes na dje i na mes momentu kòrda nan ku e fecha ta yegando. Algun di e medidanan ku nan mester tene nan mes na dje ta e grandura di nan trùk di pan, e espasio di e trùk di pan pa kaya i prinsipalmente ku nan mester move e trùk tur dia na momentu ku nan sera. Ningun trùk di pan  ku ta kai bou di e kategoria mobil no por keda para na e sitio di benta despues ku sera.

Hefe di departamento di Inspekshon Ekonómiko Ronny Cornelis a indiká na EXTRA ku a duna hopi chèns 2 aña largu i awor si lo bai kuminsá aktua, kontra di esnan ku no ke tene nan mes na e medidanan stipulá pa Gobièrnu.

Durante di e kontrol ayera, e trùknan di pan ku tabata na  òrdu por a sigui ku nan benta miéntras ku esnan ku no tabata na  òrdu, a keda será. Tambe tabatin vários trahadó ku a haña prosèsverbal debí ku nan tabata laborá sin tapa boka bistí.