WILLEMSTAD.-Djadumingu 7 di sèptèmber último a selebrá e tradishonal Dia di Sabaneta konhuntamente ku e dia habrí di Carmabi. E selebrashon tabata un éksito kompletu kaminda e públiko presente aparte di por a saboriá platonan tradishonal di Korsou tambe por a disfrutá di aktuashon di gruponan musikal i tambe di Kaha di Òrgel.

Personanan ku a hiba palabra tabata organisadó di Dia di Sabaneta Sr. Echi Cijntje, direktor di Carmabi Sr. Manfred van Veghel, Minister di GMN Sr. Javier Sylvania miéntras ku e apertura ofisial tabata na enkargo di Minister enkargá ku e.o. kultura, Sr. Cey van Heydoorn.

E ministernan a haña un paseo paden i tambe rondó di e lanthùis ku awor ta Museo Savonet i tambe nan por a presensiá e ‘winkel di smid’ ku a keda restourá i ku awor ta kompletamente funshonal bèk, algu úniko na Korsou. Riba portrètnan por mira momentunan ku e dos ministernan tabata risibí splikashon for di Naomi Cijntje, abitante di Sabaneta i empleada di Carmabi, relashoná ku e historia di Sabaneta.

Hopi remarkabel tabata e interes hopi haltu serka  bishitantenan pa purba toka kaha di òrgel. Durante di kasi henter dia tabatin hende hòmber i muhé, adulto i hóben, pará den rei of sintá ta warda nan bùrt pa por a drai e kaha di òrgel. Ku hopi pasenshi e tokadó i doño di e kaha di òrgel, Sr. Eric Meulens, huntu ku su tokadó di wiri, Sr. Eric Gerard, a tuma nan tempu i ku splikashon i guia, kompañá e interesadonan i asina laga nan purba di toka e kaha di òrgel. Remarkabel ta tambe ku hopi a logra di toka e kaha kedando den ritmo. Konklushon ku por saka for di esaki ta ku na Korsou tin tòg hopi hende ku interes pa por toka e instrumento lokal i kultural akí.