No ta tolerá nada ku ta krea peliger pa salubridat

WILLEMSTAD. - Arnold Dwarkasing Hefe di Servisio Veterinario a duna di konosé na redakshon di EXTRA ku nan ta apliká 0-toleransia  den kasonan di kontrabanda di animal. Esaki tabata motibu ku su mainta despues ku a interseptá dos makaku riba un lancha ku a bin ku venezolanonan, a pone e makakunan drumi.

E akshon aki ta pa protehá primeramente komunidat i tambe otro animalnan aki na Kòrsou di malesa.

Dwarkasing a splika ku e echo ku e animalnan aki ta di kontrabanda ta nifiká ku no tin un bista di nan estado di salú i esaki ta nifiká ku manera tuma e animalnan aki den beslag, ta hiba nan den karentena.

Manera ya menshoná Kòrsou tin un 0-Toleransia i ta pone nan drumi mesora.

Esaki ta forma parti di un lei. Pa motibu ku tin e otro posibilidat ku por manda e animalnan bèk nan lugá, pero eksperensia a mustra ku ta sumamente difísil pa manda animalnan bèk for di unda nan a bin.

Den pasado a hasi diferente ehersisio i asta a yega di hiba e animalnan un “Opvang Centrum”, despues ta resultá ku esnan ku a bestèl e animalnan, di un  manera òf otro, e hendenan ta logra bai ku e animal. Esaki a pone ku no ta tolerá mas.

Den e kaso di makaku, Dwarkasing a splika ku makaku ta karga hopi tipo di malesa ku por keda transmití pa hende i tambe otro animalnan.

Esaki ta pone ku si no tin un sertifikado di e animal, ta difísil laga nan na bida i p’esei ta pone nan drumi.

Tur esaki ta pa protehá e komunidat aki.

Pues komunidat di Kòrsou no ta kore niun riesgo ku mester tèst e animalnan aki pa no forma peliger pa niun hende.

Pa loke ta trata e asuntu di makaku ku COVID-19, Dwarkasing a splika ku e makaku generalmente tin muchu mas resistensia ku hende.

Pero den e kaso spesífiko aki, Dwarkasing a splika ku a atendé e makakunan den un forma di koutela i asina poné nan drumi.

Kontrabanda di animal a baha hopi. Tempu ku barkunan di fruta tabata bin, tin hopi animal ta yega Kòrsou di kontrabanda, pero awor aki ta masha poko kontrabanda di animal ta keda señalá.