WILLEMSTAD.- E dia a yega!, awe despues di mèrdia e lansamentu ofisial di ‘Lanta Bek’ ta tuma lugá. Ta trata di e di dos piesa dje proyekto ‘Muzik sin Barera’ di Dibo Doran i Randal Corsen.

E promé piesa tabata ‘Willemstad’ ku a keda grabá na Power Sound Studio na Hulanda. ‘Willemstad’, un balada ku kompañamentu musikal di ‘Ricciotti String Ensemble’, ku a partisipá tambe den ‘Lanta Bek’.

Letra di ‘Lanta Bek’ tabata den man di Dibo i Jeon, e komposishon musikal ta di Dibo, Randal i aporte di Jeon. Randal tabata responsabel pa e areglo.

‘Lanta Bek’ ta un piesa mas ‘grandi’, esta e ta konta ku partisipashon di mas músiko. Ta trata di un tema den e género urbano, pero ku tin influensia di muzik klásiko, pop, R&B, gospel i te hasta Rock.

Den produkshon dje piesa e duo di Dibo D i Randal por a konta ku kolaborashon dje produktor ‘Slick’ konosí pa produkshon di diferente éksito den e género urbano. Slick tabata responsabel pa e programashon dje ‘beat’.

Banda di esaki e piesa tin partisipashon di un sekshon di ritmo ‘bibu’, den kua entre otro e famoso Martijn Vink ku ta e drùmer dje kantante di Rock Hulandes, Anouk. Otro partisipantenan ta inkluí Ulrich de Jesus i Oscar Bor riba kitara, Jeroen Vierdag riba bas, Pernell Saturnino i Royston Hato riba perkushon. Komo koristanan tabatin Richard Engelhardt, Veanira Booy Reed, Tania i Lintje Isenia.

E grabashon adishonal a tuma lugá na Kòrsou na ‘Source Recording Studio’ dor di Oscar Bor. E piesa a wòrdu mesklá i masterisá na e prestigioso Power Sound Studio na Amsterdam, Hulanda.

Dibo i Randal ta agradesido na Prins Bernhard Cultuurfonds pa nan aporte pa realisá e grabashon i tambe nan aporte huntu ku El Tributo pa realisá e videoclip.

Djaweps awor ta lansa e videoclip ku ta konta tambe ku partisipashon di Jeon i ta un produkshon di Ryan QD Navarro.