WILLEMSTAD.- Dick Advocaat a bira entrenadó di selekshon di Kòrsou for di 2024. Esaki despues ku selekshon di Kòrsou, tabata bini di un periodo difísil.

Advocaat a sa di logra hiba Kòrsou bèk pa Liga A di CONCACAF Nations League i tambe klasifiká atrobe pa Gold Cup. Esaki di un bon temporada den Liga B di CONCACAF Nations League, kaminda selekshon di Kòrsou a gana su grupo danki na kuater viktoria, un empate i un derota.

Durante Gold Cup aña pasá  Kòrsou a duna un bon papel aunke nan a keda eliminá. Nan a empatá dos biaha i pèrdè nan lastu partido. Kòrsou a logra un empate kontra Canada, den un bon aktuashon di e selekshon dirigí pa Dick Advocaat.

Opviamente e logro mas grandi di e entrenadó hulandes, tabata pa klasifiká Kòrsou pa Mundial 2026. Esaki di forma invikto. Den dies partido di klasifikashon pa Mundial selekshon di Kòrsou a gana shete biaha i empate tres partido.

Dick Advocaat a hasi selekshon di Kòrsou, un ekipo difísil pa por gana di dje. Ku su enfoke pa un wega bon organisá i sólido defensivamente, Advocaat a logra hiba Kòrsou Mundial.

Advocaat a gana 11 partido, empatá 6 biaha i sufri apénas 2 derota den 19 partido ofisial na kabes di selekshon di Kòrsou.