Pero ainda e ta den negoshashon ku FFK
WILLEMSTAD.- Kombersashon ta tumando lugá, pero un desishon ainda no ta tumá. Dick Advocaat (75 aña) definitivamente ta den kombersashon ku FFK pa tuma rienda di selekshon di futbòl di Kòrsou. Pero tin un problema… “Kòrsou no tin hopi sèn”, siendo ku Advocaat ke mira ku hungadónan ta risibí un mihó trato.
Advocaat den e programa “Veronica Offside” a konfirmá ku e ta papiando ku FFK. “Nos ta den negoshashon serio”, segun Advocaat kende temporada pasá ainda tabata trainer di ADO Den Haag.
Pero ta un pregunta ainda si en bèrdat lo e tuma e trabou serka FFK. “Mi no sa ainda si mi ta bai di akuerdo, e kombersashonnan ta kurú”.
Pa Advocaat ta importante ku e trato na hungadónan ta bon. E ke mira mehorashon serka FFK. “Hotèl, biahe, etc. …kosnan ku mester drecha. Ora hungadónan yega nan mester sa kiko ta spera nan”.
Ta e profeshonalisashon ku Advocaat a hinka den selekshon Belga komo trainer na 2009. “Pero e belganan tabatin sèn. Korsou tin tiki sèn, pues nan ta evaluando pa sa si por organisá tur e kosnan ei”.
Si Advocaat i FFK yega na un akuerdo, esei ta impliká k e trainer di 75 aña pa di dies biaha den su karera lo ta tékniko di un selekshon. Den pasado el a dirigí Emiratonan Arabe, Sur Korea, Bèlgika, Hulanda (2x), Rusia, Servia, Irak i selekshon femenino hulandes. Lo e bira su di 26 trabou komo trainer prinsipal den futbòl.
Kòrsou den pasado tabatin mas trainer for di Hulanda. Ta menshoná Patrick Kluivert, Guus Hiddink, Art Langeler i Remko Bicentini. Na e momento aki Dean Gorre di forma interino ta enkargá ku e trabou.
Mayoria dje trainernan a keda pa korto tempu, ku eksepshon di Bicentini. Den yüli último el a keda retirá despues di seis wega sin viktoria.
