Kambionan entrante djamars 31 di mei próksimo

WILLEMSTAD.-Tarifa di gasolin i diesel ta konosé kambio den e próksimo periodo, asina Bureau Telecommunicatie & Post ta informa.  Entrante 31 di mei próksimo tarifa di diesel ta baha miéntras ku gasolin ta subi.

E tarifa regulá di gasolin ta subi i diesel ta baha na Kòrsou.  E preis di gasolin ta kambia di 2.56 pa liter pa 2.64 pa liter, esta un diferensia di 7 sèn mas karu. E preis di diesel ta kambia di 2.36 pa liter pa 2.34 pa liter, pues un diferensia di 2 sèn mas barata. Gas pa kushina ta keda meskos, tantu a e bòter di 20 lb komo esun grandi 100 lb.

E kambionan di tarifa pa luna di yüni 2022 pa gran parti ta basá riba kompra dor di Curoil durante aprel 2022. E tarifa usuario final pa Mogas 95 ta subi komo konsekuensia di e oumento den preis di kompra i un oumento den e komponente di Sùrplùs/Défisit. E tarifa usuario final pa LSD ta baha prinsipalmente komo konsekuensia di un bahada fuerte di preis di kompra i un oumento fuerte den e komponente di korekshon di e Sùrplùs/Défisit. E último aki a bini por parti dor di e prosesamentu di e mitar di e paso pa oumento di e preis di kompra di luna pasá. E fluktuashon di preis riba merkado internashonal ta hopi fuerte e último simannan. Esaki ta reflehá e insiguridat grandi riba merkado i por tin efekto di oumento di preis den e próksimo lunanan komo konsekuensia.