WILLEMSTAD.- Fundashon pa Konsumidó un biaha mas a tuma nota di diferente den preis serka supermerkadonan. Nan a hasi komparashon di preis i ta presentá na konsumidónan e supermerkadonan ku mihó preis i mas surgi.

Despues di a publiká a anotashon di preis riba material pa konstrukshon, Fundashon pa Konsumidó ta publiká e anotashon di preis riba produktonan ku tin den supermerkado.

E anotashon di preis aki ta konsistí di produktonan di alimentashon ku mas nos ta kumpra den supermerkado.

Fundashon pa Konsumidó a bishitá un kantidat di 17 establesimentu i a hasi anotashon di 126 produkto.

E 17 establesimentunan aki ta: Van den Tweel, Arco Iris, Best Buy, Bon Bini, Boulevard Marketplace, Centrum Mahaai, Centrum Piscadera, Carrefour, Timmy, Esperamos, Mangusa Rio, Mangusa Hypermarket, Ruyterkade, Vreugdenhil, Luna Park, LZF I Queens.

E anotashon di preis aki a tuma lugá den e periodo di 30 mei-7 di yüni 2025 i manera ta kustumber. Fundashon pa Konsumidó a kompará produktonan a base di marka i kontenido.

Mihó preis i mihó surti

E supermerkado ku mihó preis riba e makutu pre selektá aki a resultá di ta Bon Bini supermarket ku 36 produkto, na di dos lugá Mangusa Rio ku 32 produkto i Mangusa  Hypermarket na di 3 lugá ku 31 di e 126 produktonan di e makutu pre selektá.

E supermerkado mihó surti a resultá di ta Mangusa Rio ku 104 produkto, na di dos lugá Mangusa Hyper ku 102 produkto i na di tres lugá Bon Bini supermarket ku 99 produkto.

E makutu pre selektá aki ta basá riba produktonan di alimentashon i ta varia di aros, hariña, bonchi, suku, te ku zeta, kòfi, te, lechi i limonada. Tambe tin produktonan di uso personal manera habon pa baña, pasta di djente, kotèks femenino i papel di wc.

Pa limpiesa di kas, Fundashon a anotá preis di entre otro: habon pa laba tayó, desinfektante i blich.

Resultado di e anotashon di preis

Despues di a analisá e lista di anotashon di preis, Fundashon pa Konsumidó por a tuma nota di un diferensia di preis entre supermerkadonan.

Por ehèmpel kòfi Nescafe 85 gr, na Bon Bini ta kosta cg 6.99 i na Boulevard Market Place esaki ta kosta cg 11.69, tambe por a tuma nota di Quacker Quick cooking 660 gr na Vreugdenhil ta kosta cg 9.96 i na Ruyterkade cg 16.75. Mirando e diferensianan aki, Fundashon pa Konsumidó ta konsehá tur konsumidó pa konsultá e lista promé ku bai hasi kompra.

Pa fasilitá i pa informá  konsumidónan mas mihó, Fundashon pa Konsumidó ta pone tur e 126 produktonan di makutu di supermerkado den un tabèl ya asina kada konsumidó por tin un bista mas amplio na kua supermerkado ta mas kumbiniente pa e hasi su kompranan.

Tur interesado ku kier haña kopia di e tabèlnan aki por tuma kontakto ku ofisina di Fundashon pa Konsumidó na telefòn: 462-6666 òf via e-mail: info@fundashonpakonsumido.cw.

Por wak e tabèlnan tambe riba wèpsait: www.fundashonpakonsumido.cw.