Diferensia grandi den preis di “seafood”

WILLEMSTAD.- Manera ya ta un tradishon den e temporada di kuaresma, Fundashon pa Konsumidó, (FpK) den estrecho koperashon ku Inspekshon Ekonómiko di Ministerio di Desaroyo Ekonómiko, a hasi anotashon di preis di produktonan ku konsumidónan ta kumpra mas durante e temporada aki. Fundashon pa Konsumidó na su turno a analisá e resultado di e investigashon i ta publiká e resultado den un komparashon di preis.
E anotashon di preis a tuma lugá den e periodo di 27 di mart pa 4 di aprel 2019. Na e okashon aki Inspekshon Ekonómiko di Ministerio di Desaroyo Ekonómiko a bishitá 13 diferente establesimentu i a kontrolá preis di un kantidat di 141 produkto.
E supermerkado- i minimarketnan ku a keda bishitá ta: 2000, Arco Iris, Best Buy, Bon Bini, Boulevard Market Place, Centrum Mahaai, Centrum Piscadera, Dande, Esperamos, Mangusa Rio i Mangusa Hypermarkt, Vreugdenhil, Luna Park.
Mayoria di e produktonan ku a keda kompará ta komestibelnan òf produktonan di laman ku no ta kai bou di preis máksimo stipulá dor di Gobièrnu. E produktonan ta repartí den diferente kategoria, entre otro: tuna den bleki, salmou den bleki, makrel den bleki, saldinchi den bleki, uster, piská, bòkel, bakiou ku wesu, bakiou sin wesu, krab den saku, mix seafood den saku, bèrdura, bonchi den paki i na bleki, sòpi den bleki, funchi, maishi, roibit i chukulati.
Mangusa Hypermarket: E supermarket mihó surtí!
Fundashon pa Konsumidó ta informá ku segun e resultadonan di e komparashon di preis, Mangusa Hypermarket a sali e supermerkado mihó surtí pa loke ta trata e produktonan ku a keda pre- selektá. Di e 141 produktonan ku a keda pre- selektá, Mangusa Hypermarket tabatin 99 produkto den rèki. E di dos lugá ta bai pa Bon Bini Supermarket, kual tabatin un kantidat di 95 produkto i e di tres lugá ta bai Mangusa Rio Canario ku tabatin un kantidat di 93 produkto.
Mangusa Hypermarket: E supermarket mas barata!
A base di e komparashon di preis, Fundashon pa Konsumidó por konkluí ku e dos Mangusa supermarketnan ta esnan mas barata pa loke ta trata nos selekshon di produktonan di kuaresma. Di e 141 produktonan ku nos a selektá, Mangusa Hypermarket tabatin 40 produkto na un preis mas abou i Rio Canario tabatin 35 produkto na un preis mas kumbiniente. Bon Bini Supermarket ta keda na di tres lugá ku un kantidat di 23 produkto.
Diferensia grandi den preisnan di ‘Sea Food’
Fundashon pa Konsumidó a nota un diferensia di preis bastante grandi pa loke ta trata preis di kosnan di laman. E asina yamá ‘Sea Food Mix’ den saku, sin marka, ta kosta na Bon Bini supermarket fl. 14.95 pa kilo. Na Boulevard Market Place un saku di ‘Sea Food Mix’ sin marka ta kosta fl. 39.95. Esaki ta ta un diferensia di fl. 25.00.
Un otro ehèmpel ta preisnan di bòkel hinté ku wesu. Na tur dos Mangusa esaki ta kosta fl. 11.95 pa kilo. Na Luna Park esaki ta kosta fl. 31.95, kual ta un diferensia di preis di fl. 20.00. Por último, un kilo di filèt di salmou ta kosta na e dos Mangusanan fl. 32.95 i na Boulevard Market Place esaki ta kosta fl. 49.95, kual ta un diferensia di fl. 17.00.
Tene na kuenta
Durante e investigashon aki solamente a hasi un komparashon di preis i no a tene kuenta ku e kalidat di e produkto. Teniendo esaki na kuenta Fundashon pa Konsumidó ta hasi un apelashon na tur konsumidó pa no aseptá produktonan inferior, pa paga bon tinu riba reglanan di higiena i wak bon loke bo ta kome. Mester ta asina, ku tur produkto ta bini ku un etikèt ku ta bisa kiko ta entre otro ingredientenan di e produkto i kon a prosesá esakinan. Tambe ta di gran importansia pa kontrolá fecha di vensementu promé ku kumpra kualke produkto den establesimentu.
Pa fasilitá i pa informá nos konsumidónan mas mihó, Fundashon pa Konsumidó a pone diferente preisnan di e produktonan pre- selektá aki den un tabèl ya asina kada konsumidó por tin un bista mas amplio na kua supermerkado ta mas kumbiniente pe hasi su kompranan. Pa kualke pregunta semper por tuma kontakto ku Fundashon pa Konsumidó na number di telefòn 462-6666 òf manda nos un mail na info@fundashonpakonsumido.org.

SHARE

LEAVE A REPLY