WILLEMSTAD.- Ku regularidat Fundashon pa Konsumidó  (FpK) ta hasi un bishita na supermarket i minimarketnan, anotando preisnan riba merkado pa asina fasilitá e proseso di kompra di nos konsumidónan. Fundashon pa Konsumidó ta un organisashon independiente ku ta sali na interes di e pueblo kumpradó. E publikashon aki ta konta ku ouspisio di Ministerio di Desaroyo Ekonómiko.

Durante e periodo di 22 te ku 27 di òktober 2020 Fundashon pa Konsumidó a bishitá un kantidat di 22 establesimentu i a anotá preis di 97 produkto di karni, belèg, fruta i bèrdura. E 22 establesimentunan ku a forma parti di e komparashon di preis aki ta: supermarket 2000,  Arco Iris, Van den Tweel, Arti’s, Best Buy, Bon Bini supermarket, Boulevard Market Place, Centrum Mahaai i Piscadera, Dande, Esperamos supermarket, Exito, Mangusa Rio Canario i Hypermarket, Ruyterkade, Vreugdenhil, Minimarket LZF, LI’S, Feng Fu, Queens, Luna Park i Tropicana.

FpK ta kere ku ta bon pa enfatisá ku durante di e komparashon di preis aki no a tene kuenta ku pais di orígen, marka ni kalidat di produkto.

Mangusa Hypermarket supermarket esun mihó surti den karni, fruta, bèrdura i belèg

Despues di a analisá resultadonan di e anotashon di preis, Fundashon pa Konsumidó a konstatá ku Mangusa Hypermarket ta e supermarket mihó surti basá riba e 97 produktonan di karni, fruta i bèrdura ku a keda anotá den e periodo di 22 te ku 27 di òktober 2020. Di e 97 produktonan, Mangusa Hypermarket ta tin un total di 81 produkto den stòk. Esperamos, Centrum Mahaai i Bon Bini Supermarket ta resultá na di dos lugá ku un kantidat di 79 produkto i Mangusa Rio Canario ta na di tres lugá ku 78 produkto den stòk.

Mangusa Rio i Hypermarket tin mas produkto di karni, fruta, bèrdura i belèg na un preis mas ekonómiko.

Resultadonan di e komparashon di preis ta mustra ku e 2 supermarketnan: Mangusa Rio i Hypermarket ta e supermarketnan ku tin mas produkto na un preis mas ekonómiko. Di e 97 produkto ku Fundashon pa Konsumidó a anotá, e 2 supermarketnan ariba menshoná tabata tin 28 produkto na un preis mas kumbiniente. Esperamos Supermarket ta na di dos lugá ku un kantidat di 19 produkto i Centrum Mahaai na di tres lugá ku 17 produkto.

Diferensia grandi di preis  

Durante di e anotashon di preis aki, FpK a konstatá un diferensia grandi di preis den e diferente kategorianan. P’esei Fundashon pa Konsumidó lo suprayá e diferensianan di preis mas grandi den e kategoria di karni, belèg i bèrdura.

Den e kategoria di karni a konstatá un diferensia di preis di fl.14.70 pa un kilo di Sirloin Steak entre Arco Iris Supermarket i Supermarket 2000. Na Arco Iris Supermarket, un kilo di Sirloin Steak ta kosta fl. 15.30 i na Supermarket 2000 esaki ta kosta fl. 30.00.

Un otro kategoria ku tambe a konstatá diferensia di preis grandi den dje, ta e kategoria di belèg. Den e kategoria aki, e diferensia di preis di mas haltu ku a tuma nota di dje ta basá riba un kilo di wòrs dushi. Un kilo di wòrs dushi ta kosta na Vreugdenhil Supermarket fl. 21.45 i na LI’S Supermarket esaki ta kosta di fl. 34.95, kual ta un diferensia di preis di fl.13.50.

Den e kategoria di bèrdura  por a tuma nota ku por ehèmpel un kilo di boerenkool na Van den Tweel Supermarket ta kosta fl. 15.99 i na Esperamos Supermarket esaki ta kosta fl. 2.75. Pues, un diferensia di preis di fl. 13.24.

Fundashon pa Konsumidó ke pa nos konsumidónan tene na kuenta ku e diferensianan di preis ariba menshoná por ta mará na diferente faktor. Por ehèmpel pais di orígen, kalidat di produkto, marka etc.

Fundashon pa Konsumidó ta konsehá pa tuma kontakto ku nos na number di telefòn 462-6666 òf e-mail info@fundashonpakonsumido.org si dado kaso tin kualke pregunta relashoná ku e komparashon di preis aki. Alabes, ku e komparashon di preis aki nos ke konsientisá nos konsumidónan riba e importansia di ta bon informá promé ku bo hasi kompra. Traha bo presupuesto huntu ku bo lista di kompra i hasi kompra na un manera dirigí i responsabel.