WILLEMSTAD.- Fundashon pa Konsumidó a hasi un komparashon di preis, relashoná ku produktonan mas bendí den temporada di kuaresma. Remarkabel ta ku tin un diferensia grandi den preisnan di piska.
Manera ya ta un tradishon den e temporada di kuaresma, Fundashon pa Konsumidó, den estrecho koperashon ku Inspekshon Ekonómiko di Ministerio di Desaroyo Ekonómiko, a hasi anotashon di preis di produktonan ku konsumidónan ta kumpra mas durante e temporada aki. Fundashon pa Konsumidó na su turno a analisá e resultado di e investigashon i ta publiká e resultado den un komparashon di preis, sakando e preisnan mas notabel afó.
E anotashon di preis a tuma lugá den e periodo di 14 pa 20 di mart 2017. Na e okashon aki Inspekshon Ekonómiko di Ministerio di Desaroyo Ekonómiko a bishitá 15 diferente establesimentu i a kontrolá preis di un kantidat di 146 produkto.
E supermerkado- i minimarketnan ku a keda bishitá ta: 2000, Arco Iris, Arti’s Otrabanda, Best Buy, Bon Bini, Boulevard Market Place, Centrum Mahaai, Centrum Piscadera, Colon Supermarket, Esperamos, Exito, Mangusa Rio i Mangusa Hypermarkt, Ruyterkade, i Vreugdenhil.
Mayoria di e produktonan ku a keda kompará ta komestibelnan òf produktonan di laman ku no ta kai bou di preis máksimo stipulá dor di Gobièrnu. E produktonan ta repartí den diferente kategoria, entre otro: tuna den bleki, salmou den bleki, saldinchi den bleki, uster, piská, bèrdura, maishi den bleki òf bòter, pitipuá, roi bit na blòki òf na slais, pitipuá i wòrtel, bonchi den bleki òf paki, sòpi den bleki, funchi i chukulati.
Segun e resultadonan di e komparashon di preis, Mangusa Hypermarket i Arco Iris supermarket a sali e supermerkadonan mihó surtí pa loke ta trata e produktonan ku a keda pre- selektá. Di e 146 produktonan ku a keda pre- selektá, e dos supermerkadonan aki tabatin 100 produkto den rèki. E di dos lugá ta bai pa Mangusa Rio Canario, kual tabatin un kantidat di 99 produkto i e di tres lugá ta bai Esperamos Supermarket ku tabatin un kantidat di 97 produkto.
A base di e komparashon di preis. Fundashon pa Konsumidó por konkluí ku e dos Mangusa supermarketnan ta esnan mas barata pa loke ta trata elekshon di produktonan di kuaresma. Di e 146 produktonan ku a selektá, Mangusa Hypermarket tabatin 39 produkto na un preis mas abou i Rio Canario tabatin 38 produkto na un preis mas kumbiniente. Esperamos Supermarket ta keda na di tres lugá ku un kantidat di 20 produkto.
Fundashon pa Konsumidó a nota un diferensia di preis bastante grandi pa loke ta trata preis di piska na e establesimentunan. Un kilo di filèt di Salmou por ehèmpel ta kosta na Boulevard supermarket
49.95. Na Esperamos supermarket esaki ta kosta fl. 32.75. Pues, entre e dos establesimentunan aki tin un diferensia di preis di fl. 17.20, pa loke ta trata filèt di salmou. Un otro ehèmpel ta preisnan di Tilapia. Miéntras ku na Bon Bini supermarket 1 kilo di Tilapia ta kosta fl. 19.50, na Mangusa Hypermarket i Rio Canario e ta kosta fl. 6.99, kual ta un diferensia di preis di fl. 12.51. Por último, karkó ta e produkto ku tin e diferensia di preis di mas haltu. Na Arco Iris supermarket 1 kilo di karkó ta kosta fl. 61.50 i na Centrum Mahaai esaki ta kosta fl. 41.63. Pues, un diferensia di preis di fl. 19.87.
Tene na kuenta
Durante e investigashon aki solamente a hasi un komparashon di preis i no a tene kuenta ku e kalidat di e produkto. Teniendo esaki na kuenta Fundashon pa Konsumidó ta hasi un apelashon na tur konsumidó pa no aseptá produktonan inferior, pa paga bon tinu riba reglanan di higiena i wak bon loke bo ta kome. Mester ta asina, ku tur produkto ta bini ku un etikèt ku ta bisa kiko ta entre otro ingredientenan di e produkto i kon a prosesá esakinan.
Pa fasilitá i pa informá konsumidónan mas mihó, Fundashon pa Konsumidó a pone diferente preisnan di e produktonan pre- selektá aki den un tabèl ya asina kada konsumidó por tin un bista mas amplio na kua supermerkado ta mas kumbiniente pe hasi su kompranan. Por bishitá nan wèpsait www.fundashonpakonsumido.org pa un bista amplio di komparashonnan di preis.
Laga un komentario