WILLEMSTAD.- For di 2011 SITEK a firma diferente proyekto i protokòl ku gobièrnu; pero tur a bai den lachi. Niun a bira realidat.

Lio Plantijn a bisa ku for di tempu e ta presidente di SITEK e no a mira un kambio pa e parti di seguridat i salú di e maestronan ku mester ta garantisá. El a bisa ku SITEK mes a traha un proyekto di lei ku nan a entregá na 2014.  “Aña pasá nos a puntra ministernan kon ta para ku e proyekto di lei ku SITEK a entregá i nan ta bisa ku ainda e ta den su fase final. Despues di 7 aña”.

Tambe SITEK na 2013 teniendo na kuenta kon hóbennan ta rebeldiá, a firma un protokòl ku e tempu ei minister Ivar Asjes, den kuadro di dia di enseñansa.

Tabata un protokòl pa fomentá sivismo bou di nos hendenan, pa stima i apresiá otro. E kos ei segun Lio Plantijn, ta masha nesesario pa nos kombibí ku otro i yuda otro. E tempu ei dosentenan tabata kla, kontenido tabata kla, ta solamente mester a adapt’é na e tipo di skol. Henter enseñansa lo a disfrutá di e formashon síviko ei. E mucha mester mira ku komo maestro bo ta biba e kos ei. Pero esei tambe ta warda den lachi ainda.

Tambe SITEK huntu ku e tempu minister Irene Dick na 2015 a firma un proyekto ‘Yuda Skol Yuda bo yu’. Esei tambe ta duna maestronan un training pa detektá sierto komportashon serka e muchanan. I asina e trahadó den skol detekt’é, nan ta yama e profeshonalnan konserní i nan ta duna e mucha e guia i formashon i ta wak na kas pa asina yuda. Importante ta ku e mucha tin di sigui ku e ritmo.

Na 2011 SITEK tabatin presentashon na minister Lionel Jansen i Carlos Monk pa duna training na hendenan di skol spesial i AGO. Na e skolnan ei nan ta traha masha duru pero nan ta traha ku e formashon ku nan a haña pa traha ku hóbennan komun i koriente i no esnan ku e nesesidat spesial ei. Esei ta trese kuné ku nan ta traha duru pero e resultado ta minimal. I p’esei SITEK a pidi consultansy traha un proyekto kompleto pa duna e lèsnan/entrenamentu aki. Pero segun Lio Plantijn, den e kaso aki un ámtenar kolaboradó di e minister a bòikotiá e proyekto. Plantijn ta kòrda ku e dia ei despues di a firma nan no a ni sera e porta tras di minister ku nan a tende ei kolaboradó puntra minister ki probecho SITEK tin ku e kos aki.

SITEK no ta tras di nada pero e ke yuda enseñansa di Kòrsou. Ora yuda enseñansa di Kòrsou, ta yuda desaroyo di e pais aki.

Tur e proyektonan menshoná a keda den lachi i niun a bira realidat, segun Plantijn a bisa EXTRA