Frakshonnan ke splikashon riba kon toma di desishon a kana

WILLEMSTAD.- Frakshonnan di MAN i PAR ainda no tin bista riba ki dia presidente di parlamento, Charetti America-Francisca ta pone e reunion públiko ku a pidi ku urgensia riba eksonerashon di mas ku 3 miar florin na debe di impuesto riba agènda. America-Francisca no ta presente na Kòrsou debí na un biahe pa parlatino. Konsekuentemente no por a puntra su persona tampoko pa klaridat.

Te ku siman pasá e presidente di parlamento a bisa ku “griffie” tin e instrukshon pa den kontakto ku minister di Finansa, Javier Silvania pone un fecha pa e reunion. Preguntanan klave ku e parlamentarionan tin pa e minister ta: si den e desishon pa duna eksonerashon di tur debe di impuesto di 2017 i promé tabatin intervenshon den un kaso spesífiko pa yuda un komersiante ku tabata debe 18 mion florin na impuesto. Tambe ke sa si a neglishá e kondishonnan ku Konseho di Minister a mara na su desishon di 24 ougùstùs 2022 pa no kobra sierto debe di impuesto mas i si minister di Finansa a duna un instrukshon ku ta surpasá su outoridat. Alabes tin interogatorio si a kometé falsifikashon di dokumento den e proseso pa toma di desishon.

Informashonnan ku ta sirkulá i ku miembronan di parlamento tambe a logra pone man riba dje ta duna un bista di kon kosnan a kana te pa a yega na e desishon pa duna eksonerashon pa mas ku 3,1 miar florin na debe di impuesto. Segun ta splika ta for di 2022 e departamento di maneho di presupuesto di Ministerio di Finansa a presentá ku un dokumento pa limpia registronan di servisio di impuesto (“opschoning invoderingsbestand Belastingdienst Curaçao”) ku e number di dokumento: 2022/018846.

Huntu ku e dokumento aki tabatin alabes konseho di direktorado di asuntunan fiskal i un dokumento mas trahá pa un kolaboradó di minister di Finansa i huntu tur a bai pa e tim di sosten di ministerio di Finansa pa un reakshon. Dia 24 ougùstùs 2022 Konseho di Minister ta bai di akuerdo ku e proposishon pa limpia registronan di servisio di impuesto inkluso e konseho di direktorado pa asuntunan fiskal bou di e number di dokumento 2022/018846. E proposishon pues no ta un maneho skibí pa  servisio di impuesto, pero pa e komishon ku konseheronan apuntá pa minister di Finansa.

Gobièrnu di Kòrsou a aprobá e proposishon bou di 3 kondishon. Esakinan ta ku no ta kobra debenan di impuesto (“aanslagen”) ku a pasa fecha (“verjaar”), ku ta laga servisio di impuesto traha un maneho pa bou di sierto kondishon no kobra debe di impuesto ku un fecha (“dagtekening”) ku ta mas ku 5 aña bieu i ku pa un solo biaha no ta kobra debenan di impuesto te na un máksimo di 2.500 florin ku tin un fecha di entre 1 i 5 aña bieu.

A base di e desishon aki Ontvanger ta risibí un karta fechá 5 desèmber 2022 pa un konsehero di gabinete di minister di Finansa tambe forma parti di e komishon pa traha e maneho pa limpia registronan di servisio di impuesto. A base di e maneho ku a traha i ku a haña number di dokumento 2022/04109 a yega na un suma di 1,2 miar florin na debe dui impuesto ku lo no kobra mas den e limpiesa di registronan.

Segun parlamentarionan tin entendí mas aleu ta trata di un maneho ku lo no a trese konfushon den su implementashon. Den e maneho aki ku ta karga pues aprobashon di Ontvanger a tene kuenta ku tur tipo di kondishon fiskal ora ta hasi e tipo di ehersisionan aki.

Den un reunion di 17 yanüari 2023 sinembargo, segun e frakshonnan por a komprondé mas aleu, kosnan ta kambia. Ta duna instrukshon direkto pa kambia e maneho i pa no kobra niun debe di impuesto di 2017 i mas bieu i pa ehekutá e instrukshon aki mesora. Pues no ta wak fecha (“dagtekening”) mas di un debe di impuesto (“aanslag”) sino e periodo di 2017 i mas promé. Den e reunion aki tabatin entre otro konsehero di minister, representantenan di SBAB, representante di un komersiante i kolaboradó di Ontvanger presente.

E instrukshon aki, fechá 23 yanüari 2023 ta haña number di dokumento 2023/008009. E ta representá un suma total di mas ku 3,1 mion florin ku lo no kobra mas na debe di impuesto ku ta 2 miar florin mas tantu ku e maneho ku a skibi a base di e desishon di Konseho di Minister.

Pregunta ku parlamentarionan tin tambe ta si e minister a bai bèk den Konseho di Minister ku e dokumento numerá 2022/04109 ku ta e maneho ku servisio di impuesto a skibi i e dokumento numerá 2023/008009 ku ta e desishon pa no kobra debe di impuesto di 2017 i mas bieu pa un suma total di mas ku 3,1 miar florin.

Tambe ke sa a base di kua number di dokumento a tuma e desishon pa no kobra mas ku 3,1 miar florin na impuesto esta e number di dokumento 2022/04109 òf number di dokumento 2023/008009.