Segun Mc William ta konkluí for di palabranan di promé minister

WILLEMSTAD.- Promé minister Gilmar ‘Pik’ Pisas i direktor di Refineria di Kòrsou (RdK), Patrick Newton ta responsabel pa e frakaso di e “swap deal” ku a firma ku PdVSA. E lider di partido MAN-PIN, Giselle Mc William ta yega na e konklushon aki despues di a skucha Pisas den un entrevista radial bisando ku mester kuminsá un proseso di nobo pasobra ni sèn ni krudo no ta bini Kòrsou.

Segun e promé minister a bisa lihé lihé den e entrevista lo t’asina ku e minister venezolano ku a firma e akuerdo pa paga e debe di Petróleos de Venezuela S.A. (PdVSA) na Kòrsou ku produkto kaminda a duna PdVSA un deskuento riba e debe no t’ei mas pasobra a kit’é for di e puesto ministerial. “Ta insólito despues di harma un show ku PdVSA aki na Kòrsou di ‘somos hermanos’ (ruman nos ta) ku zjampaña unda Kòrsou a pèrdè 600 mion di dòler den e akuerdo ku awor ta bisa no ta bai risibí nada di Venezuela”, Mc William ta komentá.

Preguntanan ku e lider di MAN-PIN ke haña kontesta riba dje ta: Ta ku ken a firma? Kiko tabatin den e dokumentonan i kiko ta pasa awor ku PdVSA no a kumpli ku e dil di paga e 450 mion dòler ku barí di petroli? Por bai bèk Suisa pa kontinuá ku e proseso di arbitrahe?

“Frakshon di MAN den parlamento a pidi pa haña e dokumentonan lesa ora ku a firma e akuerdo i a hasi pregunta na promé minister Pisas, pero nunka a risibí kontesta riba esakinan. Durante e reunion riba e akuerdo entre RdK i Oryx Midstream tambe mi a puntra ki dia e barínan di petroli ta yega, mirando ku nan mester a yega for di luna di yüni.”

Segun Mc William ta splika RdK bou di eks direktor Marcelino de Lannoy a inisiá ku éksito un proseso di arbitrahe na Suisa pa kobra PdVSA 1,7 miar dòler na gastunan di retraso den mantenshon na e plantanan na Emmastad ku PdVSA no a realisá. “Ku hopi buya Pisas huntu ku vise presidente di  PdVSA i alabes presidente di Corporación Venezolana de Petróleo (CVP), Luis Enrique Molina Duque i minister di asuntunan di petroli i alabes presidente di PdVSA, Pedro Rafael Tellechea Ruiz a firma e akuerdo na desèmber 2023. Awe manera ladron di anochi Pisas ta bisa lihé lihé durante un programa radial ku e dil ku PdVSa no ta sigui pasobra no por haña esun ku a sera e dil kuné mas.”

EXTRA a trata di drenta den kontakto ku e promé minister pero no a logra. 19 di desèmber RdK i (PDVSA) a firma un ‘Settlement Agreement’, den kua a fiha un akuerdo kaminda ta interkambiá krudo pa e debe habrí ainda na Kòrsou. “Ku esaki a marka un momentu signifikante den e proseso ku RdK i PDVSA a enkaminá e último añanan, entre otro den korte di arbitrahe i finalmente riba un manera amikal na mesa di negosiashon”, RdK a informá ofisialmente.

Durante un seremonia ofishal ku a tuma lugá den e edifisio na Pletterijweg na Kòrsou, Newton, Molina Duque i Tellechea Ruiz bou di supervishon a firma e akuerdo (“settlement agreement”) bou di supervishon di Pisas. Tabata bou di guia di Newton ku a inisiá e inisiativa pa ekstendé un proposishon di kolaborashon pa asina yega na un akuerdo. Despues ku partidonan a enfrentá otro den korte di arbitrahe na Suisa na yanüari 2023, ámbos a disidí pa negoshá na mesa pa huntu yega na un akuerdo den bon kolaborashon.

“Na mes momentu, RdK a realisá e trámitenan nesesario ku “Office of Foreign Assets Control” (OFAC) pa sigurá ku no opstante desaroyonan mundial, sanshonnan òf kualke otro sirkunstansia, RdK por keda sigurá ku e lo risibí e krudo ku e por prosesá i bende riba merkado. E paso aki ta unu ku ta trese kambio signifikante den e relashon stratégiko entre RdK i PDVSA, ku ta un relashon di mas ku 30 aña. Por papia di konfiansa i un relashon mehorá atrobe, kual ta di gran nifikashon. Alabes e kolaborashon i importashon di krudo ta krea mas operashon i aktividat di barku den haf kual ekonómikamente ta benefisiá Kòrsou”, RdK ta informá.

“E kos aki ta nada mas ku otro frakaso di gabinete Pisas despues di CPR i pronto tambe Oryx Midstream miéntras ku e akuerdo ku Global ta nada otro ku un oportunidat pa un kompania estranhero gana plaka bendiendo utilidat ku Aqualectra”, Mc William ta finalisá bisando.

Foto:

...Giselle Mc William...