WILLEMSTAD - Diósesis di Willemstad a tuma nota di e veredikto resientemente di Korte Supremo relashoná ku matrimonio entre personanan di e mesun sekso i ku un falta di apertura na esaki ta keda konsiderá un diskriminashon.

Den diferente okashon Iglesia katóliko a yega serka tur nos fielnan i siudadanonan di bon boluntat, pa sigurá su posishon riba esaki.

Komo komunidat di Fe, ankrá den e Palabra di Dios, den enseñansanan di nos Señor Hesu-Kristu i tradishon di Iglesia Katóliko, Diósesis di Willemstad ke afirmá un biaha mas, lo siguiente ku klaridat i kompashon.

Iglesia katóliko ta siña ku tur persona, sin importá nan orientashon seksual, ta kreá den imágen i semehansa di Dios i meresé pa ser tratá ku dignidat i rèspèt.

Igualmente, Iglesia ta afirmá i mantené ku matrimonio ta un union sakramental entre un hòmber i un muhé, designá pa sosten mutuo di e pareha, pa prokreashon i edukashon di e yunan ku ta forma e sosiedat di presente i futuro.

“Ku otro palabra: e institushon di matrimonio no ta kreá pa leinan di estado sino pa Dios mes! E komprondementu aki di matrimonio semper tabata i lo ta e fundeshi prinsipal den enseñansa di Iglesia atraves di siglonan i e ta keda e parti integral di nos fe.”

Diósesis di Willemstad ta rekonosé ku e veredikto di Korte a lanta un kantidat di emoshon i reakshon den nos komunidat. “Nos ta urgi tur miembro di nos komunidat, pa drenta den diálogo pa por skucha otro ku un kurason habrí.”

No opstante di e veredikto aki, Iglesia Katóliko lo keda mantené su siñansa riba matrimonio i alabes ta boga pa e dignidat i derechi di kada persona. “Nos ta yama tur nos fielnan pa nos uni den orashon pa nos komunidat, pidiendo Spiritu Santu pa guia nos i sea semper instrumentonan di Dios su amor i pas, enfokando pa union i kompashon den nos palabra i akshonnan.”

Finalmente, Diósesis di Willemstad ta enkurashá tur nos rumannan katóliko i hende di bon boluntat pa drenta den diálogo konstruktivo ku boso representantenan i den boso komunidatnan di bario. “Laga nos traha huntu pa sigurá un nashon ku su leinan ta reflehá Dios su kreashon, ku ta respetá bida, protehá dignidat di kada persona manteniendo e bienestar di un i tur.”