Direktiva di AMAK i Licores Maduro ta firma akuerdo 2020-2024

... Sr. Omar van der Dijs i Sr. Manfred ‘Feko’ Gomes ...

WILLEMSTAD.- Djabièrnè último, 6 di sèptèmber, presidente di AMAK, sr. Manfred ‘Feko’ Gomes i direktor/ propietario di Licores Maduro a firma un akuerdo importante relashoná ku Festival di Tumba pa un periodo di 5 aña.
Ta bon pa menshoná aki, ku Dewars White label, ta e úniko produkto komersial ku semper a sostené Festival di Tumba i ku e akuerdo aki sr. Omar van der Dijs a demostrá ku e ta kere firmemente den e produkto: Festival di Tumba.
Aparte ku Licores Maduro ta e promé “brandingpartner” ku a firma, semper Licores Maduro ta duna un sosten pa kubri gastunan di imprenta di karchinan di entrada, ku tambe ta un montante respetá i e ta kontribuí ku produkto.
Ounke e situashon ekonómiko di pais, ta ménos bon, sr. Van der Dijs ta enfatisá, ku komersiantenan mester  duna un aporte pa salbaguardiá e festival kultural musikal mas grandi na Kòrsou, ku ta Festival di Tumba, ku ta bai pa su di 50 edishon.
Aparte di su balor kultural, Festival di Tumba ta di gran importansia pa nos desaroyo Turístiko i Ekonómiko.
Firmando e akuerdo aki, sr. Van der Dijs, kier demostrá su konfiansa den e aktual direktiva.
Tin dos kompania mas ku a duna palabra i den kurso di dianan, lo aserká, e potensial kandidatonan pa bira “ brandingpartner” di Festival di Tumba 2020.
Ta e intenshon, pa durante un konferensia grandi na fin di òktober, presentá e famia di “brandingpartners” Festival di Tumba 2020.

SHARE

LEAVE A REPLY