WILLEMSTAD – Den un komunikado ku direktiva di GreenTown a emití, nan ta indiká ku a tuma nota di ekspreshonnan via medionan di komunikashon i medianan sosial ku e fundashon ta den òf tabatin kòmbersashon ku diferente stakeholder òf ‘preferred bidder’ òf den eventual seramentu di e refineria. Direktiva di GreenTown Curaçao Foundation ta ninga kategóriko di tin tal interes. Ningun miembro di direktiva no (taba)tin kòmbersashon tokante e tópikonan aki ni ku Minister Presidènt ni ku presidente di PMO señor Clift Christian ni ku ningun otro persona òf organisashon.

Direktiva di GreenTown Curaçao Foundation ta ripití un biaha mas ku e no tin ningun klase di interes pa promové seramentu di Refineria ni di mete den ningun deliberashon i òf negosiashon tokante búskeda di un partner stratégiko. GreenTown Curaçao Foundation ta deseá gobièrnu di Kòrsou éksito den logra su meta ku ta haña un partner stratégiko ku ta kumpli ku tratadonan internashonal riba e área di polushon i mantené asina kuponan di trabou eksistente. Den e edishon di EXTRA mayan lo tin parti mas amplio di e komunikado aki.