WILLEMSTAD.- E direktiva aktual di Fundashon Sentro di Bario Otrobanda ta reakshoná riba e sentensia ku a keda diktá den nan kontra den korte. Debí na un debe ku nan tin serka FKP, FKP a hiba e fundashon korte pa paga. I tambe sali for di e edifisio. E direktiva aktual a haña sorpresa p’e demanda di FKP den nan kontra, pasobra nan no tabata na altura dje debe. Ademas si nan sali for di Otrobanda esaki tin konsekuensia serio pa akohida na muchanan i otro aktividatnan ku nan ta organisá den e bario.
FKP no por kobra SBO un retraso di hür di 23 aña na un balor di Naf. 770.000,00
Ayera Korte den Promé Instansia a dikta sentensia den un kaso ku Fundashon Kas Popular (FKP) a kuminsá kontra Sentro di Bario Otrobanda (SBO) pa pago di hür retrasá di 23 aña na un balor total di Naf. 770.000,00. Na 1992 a funda SBO ku ta un “non-profit organization”. Komo un sentro di bario, SBO su funshon ta pa yuda desaroyo sosial, mental i físiko den bario di Otrobanda. Komo un organisashon non profit SBO ta dependé di spònsernan i supsidio pa por kubri nan gastunan pa e trabounan ku nan a bin ta hasi. For di inisio SBO i FKP a sera un kontrato pa hür di e edifisio ku nan ta aden. SBO tin ku paga FKP NAf. 2.800,00 pa luna na hür. Nunka SBO no a paga e hür akí i pa un òf otro motibu e kontrato ei no ta den e bukinan di SBO. No ta konosí kiko ta kontenido di e palabrashonnan hasí na 1992 entre direktiva di SBO i direktiva di FKP. E direktiva aktual di SBO no tei muchu largu i tabata sorprendí pa e kobransa di FKP.
Na febrüari 2023 FKP ta manda kobra SBO Naf. 770.00000 na hür retrasá. Mirando ku e tareanan di SBO ta netamente desaroyo sosial, mental i físiko, SBO a aserka SOAW pa intermediashon i yudansa ku e situashon akí pero no a logra mashá. Komo SBO no a paga e kobransa, FKP a hiba SBO korte pa pidi korte entre otro pa kibra e kontrakt di hür ku SBO, ordená SBO sali for di e edifisio i tambe paga retraso di hür di Naf. 770.000,00.
Komo defensa, SBO e bisa korte ku FKP ta kobrando un debe ku a kaduká. Segun lei un hende ta pèrdè su derechi pa kobra un debe despues di 5 aña. Kada bes ku e kobradó manda kobra su debedó por eskrito, e derechi pa kobra ta kuminsá kore bèk pa 5 aña. Dor ku durante e tratamentu di e kaso FKP no por a kontra arestá SBO su ponensia ku e debe a kaduká, korte a haña ku FKP por kobra solamente último 5 añanan di hür.
Pa SBO esaki ta un viktoria grandi pasó ku e sentensia akí e debe ta baha ku mas ku Nafl. 600.000,00 i ta hasi mas rasonabel pa por yega na un areglo pa e pago.
Pa ku e sobra petishonnan di FKP, korte a dikta ku e ta kibra e kontrakt di hür entre FKP i SBO i ku SBO lo tin di sali for di e edifisio dentro di 6 luna. Tambe SBO tin ku kubri e gastunan di korte di FKP. Si ehekutá e desishon di korte den su totalidat, SBO lo mester sali for di e lokalidat na Otrobanda i no tin otro lokalidat pa e sentro di bario akí. Esaki lo tin komo konsekuensia ku SBO lo ta obligá di terminá su aktividatnan ku na su turno ta pone ku tur persona (mas ku 100 mucha/hóben ku nan ta yuda i guia tur mèrdia i hende grandi ku ta akudí pa rekreá tur siman) den bario di Otrobanda ku ta hasi uso di e fasilidatnan di SBO tambe lo pèrdè akseso na esaki, ku tur konsekuensia sosial ku esaki lo tin.
SBO ta un di e sentro di bario ku ta hopi aktivo i ku ta hasi su trabou di bario manera mester ta kaminda chikí i grandi ta akudí for di 8 or di mainta pa 10 or di anochi di diferente aktividat, i ta bon pa enfatisá ku sentronan di bario ta hasi un parti di trabou pa gobièrnu pa abitantenan di Kòrsou.
SBO pa e motibu ei ta boga pa Gobièrnu di Kòrsou awor si tuma e situashon na serio i atendé e asuntu pa SBO por kontinuá ku su aktividatnan. Ta bon pa agregá ku SBO ta e úniko sentro di bario na Kòrsou ku ta den e situashon aki, ya ku tur otro sentro di bario aparentemente ta den edifisionan di Gobièrnu i no mester paga hür. Ta bon pa korto plaso Gobièrnu di Kòrsou por reuní ku direktiva di Sentro di Bario Otrobanda pa por yega na un solushon duradero.