WILLEMSTAD.- “Komunidat di beisbòl na Kòrsou ta un komunidat hopi fuerte i na mesun momento hopi humilde. Ta konsistí di hopi hende ku hopi dedikashon i perseveransia. Den e último dianan nan a habri e komunidat pa nos por graba e dokumental ‘Homerun Curaçao’. I mi ta hopi gradesido pa esaki”. Asina direktor di esena di Homerun Curaçao, Safi Graauw, a bisa djabièrnè último den un entrevista ku EXTRA.
E ta trata un seri dokumental di tres episodio, pa emisora hulandes Omroep ZWART (Emisora Zwart), produsí pa IDTV.
Segun Safi Graauw entre 5 i 18 di novèmber un tim a graba hopi imágen i hasi hopi entrevista. Meta di e dokumental, segun Omroep ZWART, ta e siguiente: ‘E seri dokumental ta ilustrá un búskeda i na un manera natural ta trese nos den kontakto ku e bida i e soñonan di e abitantenan di e isla.’
Segun Graauw pa e dokumental ‘e komunidat di beisbòl a habri nan mes’. “Den e último periodo hopi awa seru a kai. Komo konsekuensia nos mester adaptá hopi di nos plan i nos sitanan. Pero na final mi tin ku bisa ku mi ta hopi felis ku e manera kon nos por a traha den e último dianan.” Te ainda no ta konosí ki dia e dokumental lo ta na televishon, por ta den luna di Febrüari òf Mart di aña 2023.
“Awor nos ta bai bèk Hulanda. E trabou ta kuminsá di wak tur e grabashon, kòrta i produsí. Despues Omroep ZWART ta disidí ki dia e programa lo ta na televishon. Homerun Curaçao lo por wòrdu mirá den primavera na NPO i na Kòrsou tambe.”
Graauw a graba entre otro durante Siman di Beisbòl Kòrsou. “Hopi di e streanan di beisbòl ta hende hopi korekto, hopi humilde. Nan ta duna e deporte un imágen hopi positivo.”

Graauw ta splika ku emisoranan hulandes mayoria bia ta duna solamente atenshon na solo i playanan di Kòrsou. “Pero bida na Kòrsou tin hopi mas aspekto. Ku e dokumental nos ke ku tur hende por wak un parti di ‘bida real’ riba e isla.”
Omroep ZWART ta un emisora públiko na Hulanda ku a wòrdu establesé na 2020 pa Akwasi Ansah i Gianni Lieuw-A-Soe, ku e mishon ‘pa duna héroenan nobo forsa pa konstruí un hogar pa tur hende’. E emisora a wòrdu establesé komo kontesta riba e pregunta pa mas diversidat i inklushon den e entorno di medionan di komunikashon Hulandes.