Direktor di Meteo: ‘Awor e momento a yega pa hasi mas uso di otro tipo di energia’

WILLEMSTAD.- Segun dr. Albert Martis, direktor di Servisio Meteorológiko di Kòrsou, preis di energia I preis di agrikulutura ta subiendo rònt mundu i tambe na Kòrsou. Segun Martis ku esaki e momento a yega pa papia tokante kambio di klima I su efektonan. Un di e puntonan kardinal, segun Martis, ta ku Kòrsou tin ku mitiga na otro tipo di energia.
Manera ta konosí gobièrnu di Kòrsou na mart ultimo a aprobá un plan di ruta pa asina desaroyá e plannan di mitigashon i adaptashon pa Kòrsou. Dia 10 i 11 di mei próksimo lo tin e promé seshon di e Plataforma di Kambio di Klima na Kòrsou tokante esaki.
Martis ta splika den un entrevista ku EXTRA ku ‘‘Parti di mitigashon ta kon nos por hasi mas tantu usa di teknologia moderno ku ta usa bientu i solo. Na Kòrsou nos tin hopi bientu i solo. Nos tin ku hasi mas uso di esaki. Tambe na Kòrsou nos tin laman profundo ku temperatura hopi abou, ku nos por usa pa fria edifisio. Esaki ta tres faktornan sumamente importante ku nos por usa den parti di mitigashon.’’
Parti di adaptashon tin di aber entre otro ku kuminda. Martis: ‘‘Ora nos ta papia di kambia di klima nos ta papia tambe di inundashonnan. Por ta no serka nos, pero na paisnan na unda nos ta kumpra nos produktonan. Esei ta nifiká ku lo tin skarsedat di kuminda i produkto. P’esei e ta mas miho ku nos mes ta desaroyá kon nos mes por produsí mas tantu posibel nos kuminda aki na Kòrsou.’’
Plataforma di Kambio di Klima na Kòrsou lo tuma luga dia 10 (entre 14 di merdia i 18 or di anochi) i 11 mei (entre 8 or di mainta i 12.30 or di merdia). Lokashon di esaki ta Banko Sentral di Kòrsou i Sint Maarten. Oradornan prinsipal lo ta Dr. Richinel Bulbaai, Dekano di fakultat di ingenieria i Richard Doornbosch, Presidente di Banko Sentral di Kòrsou i Sint Maarten.
Hende por registrá via secretariat.cccp@meteo.cw
Dr. Bulbaai lo papia tokante produkshon 100% energia renovabel i e posibilidatnan eksistente pa redusí uso di energia. Sr. Doorbosch lo elaborá riba efektonan ku kambio di klima tin riba e sistema finansiero mundial, i kon bankonan por fasilitá e proseso di transishon mundial pa teknologia moderno via green financing (‘finansiamentu bèrdè’).