WILLEMSTAD.-  Den un petishon pa “skors”  detenshon di e akusado L.Yeung (48), debí ku e ta kedando siegu, abogado Sulvaran a bisa, ku no ta un sekreto ku maltrato di prezunan den prizòn na Koraal Specht, nunka ta wòrdu reportá. El a puntra unda e dòkter tabata, ora ku un djaka a morde dede di Yeung, siendo e ta un diabétiko. Dor ku e ta siegu na un banda di wowo, e no por a mira e bestia. Segun e abogado, Ministerio Públiko i korte ta hasi manera nada ta pasando. Nan ta pone bui na Yeung su pia, ku ta dun’e  vários plèk blou.

El a splika ku dòkter Maduro, a bisa Yeung, pa pasa su mes angua di insulina, pero esaki por ta un peliger grandi pa e akusado, si e  wòrdu hasí robes. E abogado a  sigui bisa, ku e tin gana di sa kiko lo pasa ku Yeung, si e muri òf kaba di bira kompletamente siegu. Segun e abogado, a yega tempu pa duna rèspèt na e tipo di hendenan aki.

Segun e abogado mas aleu, spesialista di wowo dòkter Palm a bis’e ku si e Yeung keda kome aros ku galiña tur dia, esaki lo no yuda su salú, debí ku aros por ta funesto pe. Fo’i dia el a kai será, te ku aworakí, e no a kome niun otro kuminda mas, ku ta galiña ku aros. Segun e abogado, nan a hunga un wega yen bia bis’e, ku su ruman i famia por trese kos di kome pe, pero nunka mas nan a tende nada mas.

E abogado a bisa ku fiskal Jansen bia pasá a manda su kliente den blòk 6, kaminda su so por ta den un sèl. Pero segun e abogado, fiskal Jansen, no a komprondé  ku e hòmber mester ta kompletamente for di prizòn. En bes di dun’e protekshon, nan ke kastigué mas. El a bisa ku e inseguridat di e akusado ta kans’e tur dia, e no por lesa, tin e malesa diabétiko hopi pisá, kolesteròl haltu i mirando ku e ta kome aros i galiña so, su problemanan ta bira mas grandi.

Segun Sulvaran, tin un rapòrt ku ta indiká, ku e servisio médiko ku Maduro ta duna, ta totalmente insufisiente. Tabatin hende ku a muri dor di warda asina tantu ora riba e dòkter aki, segun un reportahe.

El a bisa ku dr Palm a indiká, ku Yeung tin ku haña kuminda saludabel, pa su salú no sigui bai atras. Mas aleu Sulvaran a relatá, ku e direktor di prizòn no ta habri su mes pa tende e spesialistanan , den e kaso akí i no ta kontestá ni mail òf yamadanan.  E abogado a pidi pa duna Yeung un banchi elektróniko i kambia su  kuminda. El a bisa ku a  primintí, hopi pero te ainda no a kumpli.