WILLEMSTAD.- For di despues ku departamentu di salubridat a sera kushina di prizon pa motibu di higiëna, a surgi un bruashon/tardansa den e sistema di komementu di detenidonan.

Mesora despues ku e kushina a keda sera, tim di maneho di Sentro di Detenshon i Korekshon Kòrsou a kuminsa buska un plan B i solushon pa prezunan por kome.
Ayera djabièrnè bèrdat prezunan a kome basta lat debí ku a yega na akuerdo ku e direktor di un instansia den oranan lat di atardi kual ta e instansia ku lo sòru pa kushinamentu di kuminda pa detenidonan pa e proksimó dianan. ⁶Tur kos riba gastu propio di prizon.

Ora e persona en kuestion a yama Direktor di prizon ayera, ya tur kos tabata kla regla i tabata wardando simplementa pa kaba di kushina e kuminda pa asina hasi entrega.

Despues ku a tèrmina di kushina ayera, tur kuminda a keda entregá na prizon den "shavernan" spesial pa wanta kuminda kayente i na prizon den kantina a repartí e kumindanan den e diferente bakinan.
E mesun proseso aki lo sigi den e proksimó dianan te na momentu ku tur kos normalisa.

Ta papia aki di 280 kuminda pa presunan ku un diëta spesial i 220 kuminda pa presunan ku ta kome normal.

"Na ningun momentu so, ningun siudadano den komunidat no a sòru riba nan mes pa kuminda pa prison, kos no ta bai pa loko asina", segun Direktor di SDKK Urny Floran.

Awe djasabra prezunan a haña nan pan mainta sigui pa kuminda kayente mèrdia na e orario di kome normal.

Presunan ta kome tres bes pa dia i esei lo no kambia.

Di otro banda prezunan tòg ta rabia ainda mirando ku a sera e kushina pa motibu di higiëna, pero nan ta sinti ku ta e mesun kuminda ta ser saka for di prizon i bai kushina afó, pues no sa si e kuminda ta bon pa nan salu ainda.

Prezunan a indiká ku e kuminda ta igual manera ku ta den prizon mes a kushina.