WILLEMSTAD.- Philip Martis, direktor di SVB, a splika EXTRA ayera ku e no ta ferwagt niun problema ku pagamentu di penshon na hende ku awor tin kuenta na Girobank.
Manera ta konosí Girobank djamars último a duna di konosé ku klientenan di Girobank tin ku lanta tur fondo disponibel inmediatamente. Pasobra entrante 1 di sèptèmber 2021, lo no prosesá transakshon ku drenta via Girobank su sistema di ‘online banking’ i riba dia 15 di sèptèmber 2021, lo desaktivá tur tarhetanan di débito di Girobank.
Martis a splika ku SVB te ainda ta stòrt penshun riba kuenta di hende ku ta kobra nan penshun na Girobank. ‘Poko poko e ta bira mas tiki. Pero te ainda tin hende ku no a kambia nan kuenta koriente na un otro banko.’
Martis a splika ku pa e luna aki hende ku tin kuenta na Girobank por kobra nan sèn. ‘Ku ta nifiká ku promé di ougùstùs nos lo paga e penshun pa ougùstùs. Ainda nan por kobra nan penshun. Despues Girobank lo sera e kuenta. Ku ta nifiká ku pa e penshun di luna di sèptèmber hende mester tin un kuenta na un otro banko.’
Martis ta splika ku ta toka di un grupo relativamente chikitu. E direktor di SVB ta splika ku SVB ta dispuesto pa stòrt e sèn riba kuenta di un otro banko. ‘Mi no ta ferwagt niun problema. Por ta ku algun hende pa luna di sèptèmber lo no tin un kuenta na un otro banko. Ku ta nifiká ku nos mester wanta e sèn un òf dos luna i ora nan tin kuenta nobo nos ta stòrt e sèn.’

LAGA UN KOMENTARIO

Please enter your comment!
Please enter your name here