WILLEMSTAD -- E direktor nobo di turismo Paul Pennicook ta kere ku e tin e ingredientenan nesesario pa hiba Kòrsou mas aleu. Segun Pennicook, prinsipalmente su eksperenshanan den merkadonan importante na Merka lo duna un balor agregá na nos turismo banda di otro kualifikashonnan i eksperensha ku e tin.

Manera EXTRA a informá, for di òktober último Penncook di orígen di Jamaica pero awendia ku nashonalidat merikano, a haña enkargo pa dirigí turismo di Kòrsou. Esei a tuma lugá despues di un selekshon pisá di diferente interesado. Pennicook mes no ta kere ku siendo e mes di orígen di Jamaica lo ta un konflikto di interes pa  promové Kòrsou. "Konsiderá mi un karibense", asina e ta bisa. Ya kaba el a kuminsá presentá su mes na diferente protagonista di turismo di Kòrsou. Banda di esei el a bishitá diferente merkado i resientemente e tabata parti di e mishon komersial di reino ku a bai Colombia.

Na diferente okashon den pasado Pennicook a yuda Jamaica den turismo pero el a traha tambe komo hotelero i na Air Jamaica. "Mi ta kere ku nan a skohe mi pasobra mi ta yega aki ku eksperensha amplio riba diferente tereno di turismo. Tur e kosnan aki kombiná ku e hechu ku mi konosé turismo hopi bon komo ku mi a traha na CTO a pone ku mi ta aki awor aki. Por sierto e afiliashon ku e organisashon di turismo di Caribe lo ta un di e prioridatnan ku lo bai traha riba dje", asina e ta bisa.

Pennicook a bisa ku e lo preferá pa nos komunidat no mir'é komo un hamaikino i awor aki un persona ku nashonalidat merikano pero komo un eksperto ku a hiba diferente reto na un éksito. "Mi ta un lider fuerte ku tabatin éksito den maneho di hotèl i maneho di destinashonnan i turístiko. No tin konflikto di interes ku Jamaica komo ku e merkado Jamaica ta dirigí riba Merka. Esei ta un di e prioridatnan di nos plan di turismo i mi ta familiar ku e merkado merikano. E konosementu ei lo ta un benefisio pa nos plan maestro', asina Pennicook ta bisa.

Pa Pennicook ta importante pa sigui ku e promoshon intensivo den tur e merkadonan, prinsipalmente na Merka. "Mester hiba Kòrsou na e konsumidó pa e turista ta interesá den Kòrsou. Awor aki nos tin un kampaña grandi na Merka ku sigur lo yuda", asina e direktor nobo di turismo ta bisa.

Informashonnan ku EXTRA a haña ta bisa ku e trahadónan di CTB a risibí e direktor nobo ku bon animo. Esmas, segun nos tin entendí, e ta sinta kome tur dia ku e trahadónan promé ku trabou kuminsa. Otro sektornan a indiká ku nan ta dun'é e benefisio di duda.