WILLEMSTAD.- Si parlamento habri e ‘porta’ di reklamá ora ku un minister no ta presente den sala di parlamento na momento ku ta hasi pregunta na un minister, no mester reklamá tampoko ora ku di parti di ministernan òf kualke organisashon ku parlamento invitá, indiká ku no tin parlamentario den sala pa skucha kontestá riba preguntanan. Asina presidente di parlamento, Fergino Brownbill (MFK), a bisa durante reunion di Komishon Sentral riba kompra di ambulans.

Tabata lider di frakshon di Partido Nashonal di Pueblo (PNP), Ruthmilda Larmonie-Cecilia, ku na momento di hiba palabra a remarká ku minister di Salubridat, Javier Silvania, no ta den sala di parlamento. E lider di frakshon di PNP a bisa ku minister no ta den sala di parlamento, pero ku e ta sali for di e punto di bista ku kolaboradónan di e minister si lo skucha e preguntanan ku e ta hasi.

E remarke di Brownbill tabata motibu pa miembro di parlamento pa frakshon di MAN-PIN, Suzy Camelia-Römer, bisa ku e posishon di presidente di parlamento konstitushonalmente no ta korekto. Camelia-Römer a mustra ku ta e minister mester ta den sala di parlamento i no e miembro di parlamento. Sin ke a sigui bai den profundidat riba e tema Camelia-Römer a bisa ku e ke pa notulá ku e posishon ku presidente di parlamento a asumí konstitushonalmente no ta korekto.

Camelia-Römer a indiká mas aleu ku ta algu pa parlamento den su seno mester deliberá mas den profundidat riba dje. Brownbill a reakshoná riba remarke di Camelia-Römer bisando ku e responsabilidat ta di ámbos banda, esta, tantu di parti e minister ku parlamento a yama pa te presente den reunion, komo di e parlamentarionan individual. “E miembro di parlamento tin un ròl ku e tin ku kumpli kuné na nòmber di komunidat”, Brownbill a bisa.

Segun e, Brownbill a splika e ròl di e parlamentario ta pa en todo kaso ora tin un hende den parlamento ku e parlamentario ta kuestioná pa duna e persona akí e rèspèt pa ta den sala di parlamento ora e persona akí ta duna kontesta riba e preguntanan. Camelia-Römer a para ariba ku konstitushonalmente e kos no ta manera Brownbill ta pretendé i ta mustra ku Brownbill den su ponensia no ta diferensiá entre e minister i e parlamentario.

El a splika: “No ta bai pa rèspèt. Ta bai pa konstitushon di pais. E minister a yega lat i a pone parlamento warda riba dje pasobra e mester a atendé ku un persona kaminda e por a laga su kolaboradó atendé ku e persona akí i traha un sita. E konsekuensia ta ku e minister a yega lat i pone parlamento warda dunando un splikashon dramátiko.”

Camelia-Römer ta sugerí tambe pa parlamento debatí na un otro momento riba e tópiko aki.

Foto:

Fergino Brownbill