WILLEMSTAD.-Parlamento di Kòrsou a bini huntu awe mainta, for di 10’or, pa deliberá i debatí e.o ku promé minister riba e desaroyonan rondó di e kompania di seguro ENNIA. Kòrsou ta pará dilanti di un situashon hopi delikado pa loke ta trata ENNIA. Tin kuórem pues e reunion por a habri, pero te ainda no a kuminsá e debate riba ENNIA. Oposishon a pidi pa haña dokumentunan i gobièrnu na su turno a pidi 45 minüt pa buska esakinan. A indiká ku lo pone e dokumentunan ‘ter inzage’ di manera ku tur parlamentario por tuma nota di e dokumentunan aki.

Premier Pisas a indiká ku tin deliberashon ainda ta tumando lugá ku Hulanda i p’esei e ke pidi pa mas lat e por bai sigui ku e deliberashonnan ei i tambe el a pidi 45 minüt pa buska e dokumentunan ku Parlamento ke mira relashoná ku ENNIA.

Lider i KEM sr. Martines  a pidi pa wanta ku e reunion i laga Parlamento haña e dokumentunan, pasobra awor aki no tin ningun dokumentu pues no por debatí riba kontenido. McWilliam di MAN a bisa ku ta debí na falta di transparensia no tin dokumentu, pues ta importante pa haña informashon dokumentá pa debatí. McWilliam ke mira e ‘hoofdlijnenakkoord’. Awor aki no tin nada di dokumentu i pa hiba un diskushon riba nivel tin mester di dokumentu pa atendé ku solushon di ENNIA i no pa hiba diskushon polítiko.

Thode (MFK) a kuminsá puntra ken tabata den gobièrnu i Parlamento for di 2015 te awor anto dikon esnan ku tabata den gobièrnunan i parlamentonan di pasado no a regla asuntu mihó pa ENNIA.

E reunion ta di skòrs.