WILLEMSTAD.- Kua boluntario spesial den kultura i naturalesa ta meresé e Distinshon di Cultuurfonds? Registrá bo kandidato awor mes pa e premio di 2026!

Sosten finansiero ta importante pa kultura i naturalesa i Cultuurfonds Hulanda i Cultuurfonds Karibe ta traha pa hopi aña kaba pa sostené esaki.
Pero e dedikashon di boluntarionan ta mesun importante. Nan ta traha den museo, teater, grupo di músika i kornan. Nan ta kuida patrimonionan, ta skibi buki, ta hasi investigashon i ta pasa konosementu históriko i importante. E trahadónan aki hopi biaha ta traha tras di kortina, pero e resultadonan ta visibel i por sintié den komunidat.

Pa e hendenan spesial aki tin e Distinshon di Cultuurfonds, un tipo di homenahe i un gradisimentu grandi di Cultuurfonds Hulanda pa nan esfuerso sin interes personal pa kultura, naturalesa, arte, patrimonio i paisahenan.

E Distinshon di Cultuurfonds, ku ántes tabata yama Zilveren Anjer, ta otorgá kada aña, for di 1950, na tres te sinku boluntario for di Hulanda òf di parti di Karibe di Reino Hulandes.
E entrega ta tuma lugá na Hulanda, den promé siman di yüni i ta keda entregá pa un di e Komisarionan di e Rei, ku ta tambe presidente di e sekshonnan di Cultuurfonds den e provinsianan.

Kua ta e kriterionan ku kandidatonan mester kumpli kuné?

10 aña òf mas di dedikashon boluntario ku por mustra esfuersonan den kultura i/o naturalesa;

E trabou boluntario akí ta hopi biaha huntu ku òf despues di trabou ku ta paga.

Kiko bo mester hasi pa proponé un hende pa Distinshon di Cultuurfonds?

Via un formulario ‘online’ riba e wèpsait di Cultuurfonds Hulanda por proponé kandidato:

https://www.cultuurfonds.nl/cultuurfonds-onderscheiding/voordrachtsformulier

Pa e entrega di yüni 2026, por hasi proposishonnan nobo for di 15 di yüni 2025 te 1e di sèptèmber 2025.

Si despues di un selekshon preliminar e persona proponé ta un kandidato real, e Cultuurfonds Hulanda lo pidi kartanan di rekomendashon di hende ku konosé trabou di e nominado òf lidernan ku ta duna sosten na e proposishonnan.

E kartanan di rekomendashon akí mester ta entrega promé ku 1e di òktober 2025.

Despues di esaki, e selekshon final ta keda hasí pa Cultuurfonds Hulanda.

Na kuminsamentu di yanüari 2026 lo publiká ken ta risibí e Distinshon di Cultuurfonds.

E entrega mes ta na kuminsamentu di yüni 2026 na Hulanda.

Pa mas informashon i pa wak esnan ku a risibí den pasado:
www.cultuurfonds.nl/cultuurfonds-onderscheiding

Ehèmpelnan inspiradó

Rose Mary Allen - 2024
https://youtu.be/bZwHLFj2MQ4?si=UinFQg-XMaRd6Jgu

Adolf – Dufi – Kock - 2022
https://youtu.be/XqWarJuIzws?si=iWzJwz85ZOhz4bbT