WILLEMSTAD.- Ministerio Públiko a tuma nota di e konsternashon ku a surgi komo konsekuensia di e distribushon di un video via medionan sosial ku ta mustra aktonan seksual ku supuestamente lo a tuma lugá den un ofisina di un institushon lokal. E institushon aki a indiká via di un komunikado di prensa ku e video aki no a wòrdu trahá den e institushon aki i ku nan no ta tin niun embolbimentu den e realisashon di esaki.
Mester tene kuenta ku e distribushon di imágennan pornográfiko ta un delitu kastigabel pa kual Korte por imponé un kastigu di prizòn. Ademas, e persona ku risibí un tal tipo di video i ku ta sigui plama esaki, tambe por hañ’é ku problema ku hustisia.
Lokual ta hasi esaki aun pió den e kaso aki, ta ku ta trata di mancha nòmber di un institushon i tambe di un persona. Esaki por ser konsiderá difamashon. Difamashon tambe ta un delitu kastigabel ku kastigu di prizòn.
OM ta atvertí tur hende pa apstené di realisá e tipo di aktonan aki, mirando ku nan por tin konsekuensianan drástiko pa e personanan kulpabel di plama material pornográfiko i di difamashon.