Bándariba a haña mas tantu awa den oranan tras di lomba

WILLEMSTAD.- Kòrsou ta hañando ‘un palu di áwaseru’ for di den oranan di mardugá. Pa 7’or di mainta por  a nota den área di Santa Rosa, Montaña, den área di Dierentuin i Kaminda Don Martina ku e nivel di awa ta hopi haltu kaba. Roinan tabata praktikamente yen di awa i esei ta kousa difikultat pa algun shofùr.

Servisio Meteorológiko a splika EXTRA ku e temporada aki ta unu ku bou di sirkunstansianan normal, Kòrsou ta haña áwaseru. Riba e pregunta kiko a pasa diferente ku nos ta hañando un kantidat muchu mas tantu di áwaseru e meteorólogo di warda a splika ku ta trata di un disturbio den e área aki ku ta faborabel pa nubianan ku áwaseru.

Te na e momentunan aki Meteo ta nota ku e área di Bándariba ta esun ku a haña mas tantu awa di shelu. Te ku 8’or di mainta a midi un kantidat ku ta varia entre 8 mm i muchu mas ku 20 mm den otro áreanan.

EXTRA ta rekomendá pa sea kouteloso den tráfiko, pero esei no ta nifiká stroba tráfiko di sigui su ruta. Esnan ku sa ku nan kas tin sierto defekto pa loke ta trata dak, ta bon pa tira un bista pa evitá sorpresa mas lat.