WILLEMSTAD.- Despues ku algun luna atras e kompania Divi Divi a atkerí dos avion nobo na nan flota aktual, ayera porfin e avion Twin Otter a tene su promé buelo ofisial. Segun Germaine Richie-Durand, propietario i gerente di e kompania Aéreo, e avion Twin Otter por karga alrededor di 19 persona kada un.

Divi Divi Air ta bula regular pa Boneiru i ta ehekutá buelo charter tambe pa Aruba. Ku e ampliashon di e flota ku a tuma lugá na final di aña 2017, Divi Divi Air den futuro lo kuminsá ehekutá buelo regular pa Aruba tambe. Esaki ta kuadra ku e vishon di e kompania ku ta pa yega na un konekshon mas efisiente entre e islanan Kòrsou, Aruba i Boneiru.

E enfoke di e kompania ta tambe transportá famia i amigunan entre e tres islanan. Den e kuadro aki e tipo di merkado ku Divi Divi ta mek riba dje no ta e “airlift” ku mayoria biaha ta papia di dje, ku ta enserá mas bien kapasidat pa trese turista Kòrsou.

Apesar di e ampliashon di kapasidat e enfoke di Divi Divi ta keda un servisio efisiente i konfiabel sin ku e preis di buelo ta bira mucha karu. Na momentu ku tin un siguransa i stabilidat 100% manera e plan di kompania aktual ta indiká, den futuro por bai pensa mas leu, ounke esei ainda no ta den plan.

Naturalmente mester tene kuenta tambe ku tur gastu envolví inkluso esnan di airopuerto i di “handling”. Divi Divi tin 17 aña di eksistensia i Durand ta kere ku loke ta importante pa tene e kompania chikí ku enfoke riba su vishon. A skohe e avionnan Twin Otter despues di hasi un análisis profundo di kiko ta e mihó invershon ku e kompania por a hasi den kuadro di su nesesidat i vishon ku e ta hiba.

Ayera miembronan di prensa tabatin e honor di presensia e promé buelo ofisial despues di un yegada ameno na Boneiru i tambe Kòrsou ku e tradishonal “Watersalutte”.