Willemstad- Manera ta konosí, Refineria Isla a informá ku pa motibunan di revishon na e planta di CRU, nan lo mester para e plantanan su funshonamentu pa dos siman. No opstante ku Refineria Isla a sigurá Curoil, ku Refineria Isla tin sufisiente stòk di produktonan petrolero pa suministrá Curoil debidamente, tòg djabièrnè último Curoil a risibí notifikashon ku no por risibí gas (LPG) e fin di siman aki.

Debí na e akontesimentu ariba menshoná, Curgas ta partisipá ku e stashonnan di yena gas na Muizenberg, Sta. Rosa i Tera Cora lo ta será pa públiko djadumingu awor dia 12 di febrüari. Tur trámite ta keda hasí pa djaluna 13 di febrüari, tur e stashonnan di yena gas ta operashonal, dependiendo di e momentu ku Refineria Isla reanudá suministro di gas na Curgas.
Curoil ta informá tambe ku e hecho ku Curgas no ta risibí gas for di Refineria Isla e fin di siman aki, lo no tin konsekuensia pa klientenan komersial, usuarionan di silinder di 100lbs ni klientenan na Kòrsou ni pa distribushon di gas na Boneiru.

Gerensia di Curoil ta pidi su diskulpa pa e inkumbiniensha ku e klousura temporal aki di e stashonnan di yena gas na Muizenberg, Sta. Rosa i Tera Cora por kousa i ta gradisí su klientenan pa e komprenshon.