Djadumingu famia, amigunan i konosínan a tuma despedida di e gran Alvin, “Fichi” Fleming, dirigente i pelotero estrea di nos beisbòl pa hopi aña. Mitar di diesdos famianan, huntu ku algun amigu a reuní na El Tributo Otrabanda pa tuma nan defuntu pa bai edifisio di PWFC na Rio Canario. Promé ku a sali pa edifisio di PWFC e personal dinámiko di El Tributo a duna e último instrukshonnan i repasá tur detaye huntu ku esnan mas serka di e defuntu enkabesá pa su yunan: Thessa i Andre.

...A pasa Stadion Johnny Vrutaal...

E “Wa di Morto” kondusí pa Sandley, “Karate Kid” Martina, un di nos mihó ofisialnan di beisbòl a pasa i para un ratu dilanti Stadion Johnny Vrutaal ku tabata testigu di masha hopi hazaña di e gran “Fichi” Fleming. Despues di Stadion Johnny Vrutaal a sigui pa edifisio di PWFC na Rio Canario.

...Sala di PWFC Dòrná...

Famianan enkabesá pa Soraya Marsden, yu di “Wincho” a pèrkurá pa pone Sala di PWFC hopi bunita pa risibí nos amigu i miembro di nos “Hall of Fame”.  E sala di PWFC a wòrdu dòrná ku vários dje distinshonnan di “Fichi” i tambe potrètnan ku a pone tur ku a hasi akto di presensia rekordá e gran hòmber di beisbòl/sòftbòl den su momentonan di gloria.

...Masha Hopi Hende...

1or a kuminsá risibí bishita di kondolensia i mester bisa ku for di 1or te ku 3or hendenan di tur gremio di nos isla a yega hende pa asina kombibí ku famia i tuma despedida di “Fichi”. Minister di deporte enseñansa, siensia i kultura, Sr. Sithree, “Cey” Van Heydoorn, tambe a hasi akto di presensia. Sr. Vergilly Winklar, direktor di FDDK, Sr. Rignaal, “Jean” Francisca, èks presidente di FDOK tur tabata entre esnan ku a yega edifisio di PWFC.

...Hopi èks pelotero...

Masha hopi èks pelotero i dirigente ku nos tabatin hopi aña sin a topa kuné a bin pa tuma despedida di nan amigu. Entre nan: Harold Oehlers, Bello Mujica, Richard Moesker, Wenny Jakoba, Jozef Martina, Ruben, “Big Jim” Newton (Tata di Raffy Jozefa, Orlando Nicolina, Renato Anasagasti, pero tambe vários pelotero aktivo ainda manera Ruderly Manuel.

...Prensa Deportivo...

Richard, “Chati” Constancia, Rudsel Van Lamoen, hòmbernan di prensa tambe a honra ku nan presensia. Tambe nos a apresiá presensia di Mr. Eldon, “Pèppi” Sulvaran, ku for di mucha a hunga beisbòl na Suffisant i ta un gran amante di deporte engeneral.

...Blue Hawks i Swift...

E ekiponan di: Blue Hawks i e organisashon di Swift, tambe vários tim veterano di beisbòl tabata presente.

...Parti Final...

Sra. Viviana Winklaar tabata e forlester pa e atardi bunita akí pa su doño. I manera semper el a hasi un trabou maestral. Promé ku a sera kaha 3 persona a hiba palabra. Ruman hòmber Sidney, Zef Fleming, Kenneth Gijsbertha i yu muhé di “Fichi”, Thessa. Sidney a deskribí “Fichi” komo ruman. Kenneth kende ku mikrofon den man ta “Big Leaguer” a dikta kátedra i splika di e karera di nos amigu. Finalmente tabata Thessa, yu di “Fichi” ku a konta di su tata, dje amor di tata i kon “Fichi” a instruí nan pa enfrentá bida. Pastor Welton, “Papi” Esprit despues ku a sera kaha a papia i konta di su eksperensia ku “Fichi” kende tabata yam’é Welton John. “Papi” a urgi tur hende ku ainda no tin Señor den nan bida pa buska Señor i no pèrdè tempu. I hasi esei meskos ku “Fichi”.

...Santana Protestant na Oranjestraat...

Despues ku famianan a pusha e kaha bai porta, e kargadónan a tuma e kaha, hib’é e “wa di morto” pa huntu bai Santana Protestant na Oranjestraat. E organisashon di Swift enkabesá pa Sergio “Lion” i Blue Hawks a risibí “Fichi” den porta di santana i habri kaminda pa nan ídolo bai su último lugá di sosiegu. Tabata un dia largu, pero un entiero digno pa un gran hòmber di deporte i ku a sa di krea masha hopi amigu i amistat pa su manera úniko di atendé ku tur hende. Papa Dios duna nos amigu/ruman “Fichi” Fleming Sosiegu Eterno....

Skibí pa: Taffy de Jongh.