...E arkitektura dje fachada di glas ta hasi e edifisio i su historia komo unu monumental...

WILLEMSTAD.- Djaluna korte lo disidí riba e edifisio di Cinelandia, despues ku e dos organisashonnan Fundashon Pro Monumento (ProMo) i Stichting Documentation and Conservation of the Modern Movement (DoCoMoMo) a kuminsá ku un huisio sumario pa para e desishon di gobièrnu pa basha e edifisio abou.
Sperando pa tratamentu di e kaso ku ta tuma lugá djaluna próksimo, dia 8 di febrüari, hues Martinez den un desishon LAR a disidí bin ku un medida di órden di para e karta di minister di VVRP di 15 yanüari último, pa basha e edifisio di Cinelandia abou.
Den e karta di 15 di yanüari, minister a bisa na e propietario di Cinelandia, ku ta Handelsmaatschappij CMOG, e direktor sr. Fernando da Costa Gomez, ku e tin un luna pa basha e edifisio abou i tambe dentro di un siman, e propietarionan mester a presentá ku un plan di kontratista kon ta bai basha e edifisio abou.
Segun hues Martinez den su desishon, mirando reakshon di VVRP, no ta deskartá e posibilidat ku tòg lo basha e edifisio abou, i pa evitá esaki e ta bin ku e medida di órden di “schors” e karta di minister di VVRP di 15 yanüari último.
E karta di 15 yanüari último a dal e dos organisashonnan duru, mirando ku nan a gana un kaso den korte den pasado, pa no basha e edifisio abou, pasobra e ta un monumento. Pero mas ku tur kos, e fachada su arkitektura ku ta konta mas pisa den e asuntu di ta un monumento.
E fundashonnan ta indiká ku e edifisio ta úniko den sentro di siudat i úniko riba su mes tambe. Sentro di siudat ta rekonosé komo patrimonio nashonal (UNESCO) i Cinelandia lo ta un di e edifisionan importante pa e akreditashon na nivel mundial loke ta hopi importante pa nos turismo.
Pa basta aña e propietario kier a basha e edifisio abou, pero e sentensia a pone ku e doño a laga e edifisio keda para asina.
Minister a hasi uso di artíkulo 44 di e Lei di Konstrukshon i Biniendo, pa ‘sloop’ e edifisio denter di un luna di tempu despues di a risibí e karta. Tambe dentro di un siman e kontratista ku ta bai desmantelá Cinelandia mester bin ku un plan ta kon esei ta bai tuma lugá, i e tin di entregá esaki na Inspektor General di e Ministerio di Desaroyo Sosial, Labor i Bienestar.
Pues djaluna hues ta trata e kaso i mesora ta tuma un desishon kiko lo ta suerte di Cinelandia.