WILLEMSTAD.- Djaweps awor dia 17 di sèptèmber Ministerio Públiko (OM) ta bai bende algun outo, un bròmer i tambe un boto na findishi. Ta trata di vehíkulonan ku a keda konfiská.
Riba djaweps 17 di sèptèmber 2020 pa 11 or di mainta, Ministerio Públiko i Integraal Afpakteam Curaçao pa intermediashon di deurwaarder ta pasa pa benta públiko di un kantidat di vehíkulonan motorisá ku a keda konfiská.
E loke ta ser bendé ta un bròmer, un outo marka Huyndai 2015 Elantra, un outo marka BMW 2003, un outo marka Mercedes Benz di 2012, un outo Volkswagen Touraq 2010, i un outo marka Jeep 2015.
Tambe lo bende un boto di plaser tipo “open fisherman/motor” di aña 2000, largura di 9.14 meter i hanchura 2.38 meter, ku dos motor pafó marka Mercury. Hasta e trailer di aluminio dje boto ta na benta.
Den e último añanan, Integraal Afpakteam Curaçao hiba diferente investigashonnan i akshonnan den kua a konfiská un gran kantidat di artíkulo.
E investigashonnan i akshonnan aki tabata mas tantu dirigí riba kapital ku a keda optené pa medio di aktividatnan kriminal. Ku e benta públiko aki, Ministerio Públiko i Integraal Afpakteam Curaçao ke manda un señal kla na komunidat ku no mag di saka benefisio for di krímen.
Ministerio Públiko i Afpakteam tin intenshon di sigui tene e benta públiko nan aki ku regularidat.
Artíkulonan ku lo bende den públiko ta entre otro outo i skuter. En konekshon ku COVID-19, pago mester tuma lugá via di depósito na banko òf swipe.
Un i tur ku ta interesá por presensia e subasta riba e tereno di Arbeidszorg situá na Bellisimaweg z/n (zijweg Sta. Rosaweg pegá ku SUVEC). Por mira e vehíkulonan riba dia di benta for di 8 di mainta.

LAGA UN KOMENTARIO

Please enter your comment!
Please enter your name here