WILLEMSTAD.-Den oranan di mainta algun parti di Kòrsou a haña un poko áwaseru. Dominguitu, Koraal Specht, Janwé i Saliña ta algun di e áreanan kaminda por a nota ku basta áwaseru a kai. Asta a bira difísil pa move riba kaya debí ku no por a distinguí e kaya for di alsera òf riol. Tur kaminda tabatin hopi awa.

E skol di fundeshi di Albert Schweitzer na Saliña muchanan mester a keda paden ya ku awa a yena e lugá di hunga kompletu.

Por a nota ku e konstrukshon na haltu di e pòmp di gasolin Pablo Frederik a duna fruta den sentido ku e lugá ta na haltu awor i áwaseru haltu no ta stroba su operashon. Banda di e agensia di KIA e awa tabata bastante haltu te ku no por a mira bon unda ta kaya i unda ta riol.

Den kombersashon ku minister Charler Cooper enkargá ku infrastruktura (VVRP) el a deklará na EXTRA ku e loke mester sosodé ta parti di un plan grandi di infrastruktura. E plan aki tin un sifra basta haltu mará na dje. Segun Minister Cooper, lo tin mester di 10 mion florin pa realisá e plan grandi di infrastruktura den área di Saliña. E plan ta enserá atendé ku ‘dilernan’ na altura di Nieuwehaven. Esaki mester yuda e fluho di awa u ta bini for di pariba di Kòrsou, pasa Kabouterbos etc pa laman via di e parti patras di Advent na Groot Davelaar i bai laman.

Minister Cooper a indiká ku e plan aki ta parti di un plan di mas aña ku gobiernu ta traha riba dje.