...miembronan di sindikato DOEN den reunion ku minister van Heydoorn...

WILLEMSTAD.- Sindikato DOEN den siman tras di lomba a reuní ku minister Sithree van Heydoorn. "E reunion tabata un reunion pa sera konosí, pero e sindikato a probechá mesora pa palabrá reunionnan di 'follow up' pa profundisá riba e tópikonan ku nan a trese dilanti"
Minister van Heydoorn a duna un splikashon amplio di kiko e komo minister tin pensá na hasi durante su periodo di gobernashon pa salbaguardiá enseñansa i pues hasi enseñansa prioridat komparabel ku e karteranan di finansa i ekonomia.
Den e kuadro akí Sindikato DOEN a para ketu tantu riba aspektonan individual ku ta regardá miembronan komo aspektonan general.
Situashon Aktual: Konsiderando e impakto ku Covid tabata tin riba e aña eskolar tras di lomba i tambe e konsekuensianan ku esaki lo trese kuné den e próksimo añanan eskolar, Sindikato DOEN a proponé na minister algun idea kon pa atendé riba término kòrtiku ku e situashon den enseñansa. Un di e ideanan ta pa meskos ku a bini ku eksepshonnan den norma pa e.o. èksamen, pa hasi di henter aña eskolar nan ku ta bini un eksepshon. Ku otro palabra tanten no tin sufisiente sèn pa bini ku un maneho riba término kòrtiku kaminda ta tene kuenta ku e konsekuensianan di un aña eskolar tras di lomba den pandemia, sin ku a invertí den enseñansa, sin ku a invertí den e trahadónan den enseñansa, sin ku a duna vèlt di enseñansa e guia nesesario i ku pues tur pero tur kos a kai den skochi di vèlt. Kon, kiko i riba kua aspekto DOEN a palabrá ku minister ku lo pone esaki riba papel pa den e reunion di 'follow up' ariba menshoná profundisá riba esakinan.
Fakansi Grandi di Mas Kòrtiku den historia: Un di e puntonan agudo ku Sindikato DOEN a pone na atenshon di minister ta ku despues di e aña eskolar mas pisá ku a konosé den historia di humanidat, aki na Kòrsou ta bai haña e fakansi grandi di mas kòrtiku den historia.
Konsiderando e impakto ku e pandemia akí tin riba nos tur, esta alumno, studiante, maestro i mayor, e fakansi grandi akí mas ku nunka ta hopi importante pa tur e aktornan ya menshoná embolbí por rekuperá e energia i pas mental nesesario pa dil ku e aña eskolar nobo ku tambe lo ta un aña eskolar den pandemia. Riba esaki minister a indiká ku e tin atenshon pa e aspekto akí, pero no por duna un 'uitspraak' ainda.
Partisipashon Sindikal: Finalmente DOEN a palabrá ku ta habrí pa traha huntu na bienestar di su miembronan i di enseñansa i ku den e kuadro akí e partisipashon di sindikato representando trahadónan den enseñansa ta fundamental.
Pa loke ta trata esaki minister van Heydoorn a indiká, tambe públikamente, ku e lo duna tur sindikato partisipashon ya komo ku ta e trahadó so por disidí kua sindikato ta represent'é i no minister òf dunadó di trabou. Esaki ta loke ILO òf OIT (Organisashon Internashonal di Trahadó) ta indiká den kuadro di derechinan humano ankrá den tratadonan internashonal. Ta basá riba e tratado akí por sierto Sindikato SEU di Aqualectra a gana kaso kontra gerensia di Aqualectra na momento ku gerensia no tabata ke rekonos'é ni tampoko duna Sindikato SEU partisipashon.
Pues aworakí DOEN ta trahando riba loke a palabrá ku minister, pendiente pa e reunion di 'follow up' ariba menshoná. “Trabou tin; pues ta ora pa DOEN”, segun e presidente.