Wallid Elhage: Asin’aki nos ta trata ku nos profeshonalnan?

WILLEMSTAD.-Ta asin’aki nos ta trata ku nos profeshonalnan? E kos aki ta ‘jammer’. E kos aki no tabata na nodi, mester trata hende ku mas rèspèt.” Esei ta e promé palabranan di dr. Wallid Elhage eks presidente di asosiashon di dòkternan di kas(CHV) den deklarashon na EXTRA. Wallid Elhage ta un veterano dòkter di kas bon konosí den e komunidat aki pa su konosementu  hopi aña di eksperensia. EXTRA a puntr’e su pensamentu despues ku e aktual presidente dr. Semper a tuma retiro komo presidente di e asosiashon.

Na opinion di dr. Wallid Elhage ta hopi lamentabel ku un profeshonal relativamente hóben ku ta na kabes di e asosiashon a tuma desishon pa baha. Den e lantamentu i e ‘huisartsenpost’ HAP e asosiashon di dòkternan di kas a pone su hendenan na disposishon pa yega na algu mihó pa e komunidat aki. Ta di forma boluntario e profeshonalnan aki ta hinka 20 ora pa siman pa yuda konstruí algu bon pa e komunidat aki anto mester haña krítika di tur banda anto pa kolmo kartanan sumamente ònbeskòp di parti di funshonarionan di gobièrnu. Ta dikon mester aktua di e forma ei, komo hende adulto mester por papia ku otro na drechi.

E asosiashon a lucha hopi aña pa yega na un HAP pasobra esaki ta hopi nesesario. CHV ta kontentu tambe ku porfin tin un HAP pero e forma ku finalmente e gobièrnu aki a realisá e HAP no ta gana premio di bunitesa. Pues un HAP ta hopi nesesario pero e mihó manera tabata pa hasié huntu kue asosiashon di dòkternan di kas. Echo ta ku a lanta un HAP, pero kaminda dòkternan di kas no tin nada di bisa. E sistema ku ta trata profeshonalnan di ‘take it or leave it’ simplemente no ta korekto. E kos aki no tabata na nodi!

Elhage a mustra riba un punto sumamente importante, esta ku gobièrnu no a tene kuenta ku eksigensianan ku médikonan mester kumpli kuné den nan trabou. Un dòkter di kas mester traha por lo ménos 50 ora di warda pa aña. Esaki ta un mester pa asina e dòkter di kas por keda up to date ku kasonan di urgensia. Kasonan di urgensia no ta anochi so! Ta e funshon komo dòkter di kas ta eksigí ku mester a traha por lo ménos 50 ora di warda pa aña, asina Wallid Elhage a deklará na EXTRA.