WILLEMSTAD. – Ayera Korte konforme Lei  Atministrativo a tuma un desishon den e petishon ku dòkter Patrick Fa Si Oen a entrega na Korte p’asina suspendé e desishon di Inspektor di Salubridat, ku ta prohibié traha komo siruhano. E petishon a keda tratá dia 22 di febrüari tras di lomba i ayera hues mr. Martinez a tuma su desishon. E desishon ta ku Inspektor di Salubridat mester hala su desishon aden i duna asina espasio pa Fa Si Oen hasi su trabou den Sehos.

Den un veredikto di 5 página, bon motivá i ku no por apelá, hues mr. Martinez ta duna un splikashon amplio ken ta dòkter siruhano Fa Si Oen, basá riba su dokumentunan ku e tin i kiko ta su profeshonalismo.

Durante e tratamentu di e petishon di Fa Si Oen e Inspektor i su abogado a keda para riba nan punto ku dòkter Fa Si Oen no ta apto pa sigui traha, pero di otro banda Abogado mr. Luigi Virginia den un forma detayá a trese dilanti ku simplemente e Inspektor no tin rason den e loke ku e ta trese dilanti.

E abogado a trese e CV di dòkter Fa Si Oen dilanti ku ta un impreshonante i ku defakto hues no a duda den e CV aki.

Dòkter Fa Si Oen ta un siruhano ku ta responsabel pa 20 operashon pa siman den Sehos, a sigui diferente kurso ku éksito i a skibi vários literatura.

E ta un di e siruhanonan ku ta duna guia i konosementu na otro siruhano nan.

Un tendementu di otro siruhanonan no por a bisa otro i a mustra ku sin mas nan tin hopi rèspèt pa e trabou di Fa Si Oen.

A sali na kla ku e tin tur  diplomanan nesesario pa e hasi e trabounan.

Ku e konklushon aki hues a ordená Inspektor pa hala su karta aden i asina duna Fa Si Oen kaminda pa e sigui traha den Sehos inmediatamente.