WILLEMSTAD.- Dòkternan di kas a disidí sigui un prosedura a fondo den korte kontra di gobièrnu p’e desishon pa nan baha ku 65 aña. E edat di 65 aña ta esun ofisial pa tur trahadó baha ku penshun, i eks minister di salubridat sra. Camelia-Römer a bini ku e maneho pa tur dòkter di kas i spesialista pa baha ku penshun ku 65 aña.
Ta trata aki di alrededor di 23 dòkter di kas ku den luna di yüni último a entregá e petishon pa entamá un huisio sumario kontra di gobièrnu, p’e edat ku nan tin di stòp di traha. Pero den korte, gobièrnu a indiká ku lo duna e dòkternan un periodo di transishon di 2 aña. E transishon ta konta p’esnan ku tin 65 aña i mas, pero esnan ku tin 62 aña no. Awor e dòkternan a disidí ku no ta sigui ku un huisio sumario, pero a someté nan mal kontentu na un hues den prosedura a fondo den korte, pa duna un sentensia.
E dòkternan ta para riba ku nan ke sigui traha te na momentu ku nan mes disidí pa stòp di hasi esaki. Ademas e dòkternan a entamá e prosedura, debí ku ainda e proseso ku ta regla e transishon di 2 aña no ta reglá. E dòkternan di kas a disidí ku nan no ta keda sinta, nan ke mira kosnan riba papel, p’esei a bai e prosedura a fondo.
E proseso den prosedura a fondo na e momentu aki ta kaminda partidonan ta entregá nan nota di defensa i mester reakshon riba dje. Awor aki e proseso ta kontinuá te den luna di novèmber próksimo.
E lei di baha ku 65 aña òf mihó bisá baha ku penshun, mester a drenta na vigor dia 1e yanüari 2020, pero manera indiká e dòkternan a haña un periodo di transishon.
Mester menshoná ku aña pasá e grupo di spesialistanan tambe a start ku un huisio sumario kontra di gobièrnu p’e mesun rasonnan esta di baha ku penshun ku 65 aña. E spesialistanan médiko tambe a haña e periodo di transishon.
Mirando e situashon di COVID, i tambe e proseso ku ta dura, ta te otro aña lo por tin un sentensia den e kaso aki.