WILLEMSTAD.- Den un entrevista eksklusivo EXTRA a kòmbersá ku un hóben dòkter yu’i di Kòrsou ku ta traha na un hospital na Hulanda Thais Tong.

Thais huntu ku su dos koleganan Lung Jeung i Louisa Kluijver ámbos yu’i di Kòrsou bibá na Hulanda, a disidí boluntariamente di bin Kòrsou riba nan propio inisiativa pa yuda pashèntnan ku COVID den Curaçao Medical Center (CMC).

Nan mes a paga nan ticket i estadia usando nan dianan di fakansi pa bin Kòrsou, despues di a tende kon serio e vírùs ta atakando nos komunidat.

Despues ku Thais a kaba su VWO na MIL, el a biaha bai Hulanda ku 17 aña pa studia medisina na Leiden.

Aña pasá el a kaba ku su estudio i awor tin e título di médiko básiko.

Thais awor ta  trahando komo “artsonderzoeker”  (PhD kandidaat) na Leids Universitair Medisch Centrum i ta bai spesialisá su mes den “Interventie Radiologie”.

Aworakí Thais ta hasiendo un investigashon riba e tipo di kanser na wowo ku ta “Oogmelanoom”. Thais a splika ku e kanser aki tin pronóstikonan basta malu i pashèntnan ku tin e malesa aki, ta muri basta lihé debí ku e ta plama mes ora den bo kurpa.

Debí ku e ta un tipo di kanser ku ta bini hopi tiki dilanti, nan ta bezig ta investigando dos tratamentu relativamente nobo pa asina purba duna e pashènt un kalidat di bida hopi mas mihó i poko mas duradero.

Aparte di esaki Thais ta eks presidente di e organisashon Asosashon di Médiko di Antias (AMA). AMA ta un asosashon pa profeshonalnan den sektor médiko ku ta biba i traha na Hulanda ku ta bini for di Aruba, Boneiru, Kòrsou, Sint Maarten, Saba i Sint Eustatius. Nan ta konsistí di mas ku 200 miembro ku no ta den rango solamente di medisina pero di apotheker i dentista ku un dia lo ke bai bèk un di e islanan.

El a splika ku tin hende ku ke bai bèk nan isla a largo plaso i tambe riba korto tempu spesífikamente den e pandemia aki pa duna un man adishonal.

Keda pendiente pa mas di e entrevista di Thais riba plataforma digital di EXTRA.