WILLEMSTAD -  Djabièrnè dia 29 di òktober 2021 e dòlfein maskulino Tulum di 7 aña di edat na Dolphin Academy a fayesé repentinamente. E direktor i bosero di e dòlfeinnan George Kieffer ta informá ku henter e personal di Dolphin Academy ta sumamente tristu pa e suseso aki.

Tulum a fayesé djabièrnè alrededor di 1or di mèrdia a konsekuensia di un leshon fatal na su kabes, ku aparentemente el a risibí na momentu ku e tabata hunga ku otro dòlfeinnan promé ku e inter-akshon kuminsá. Na momentu di e suseso Tulum tabata landa ku 6 otro dòlfein inkluyendo su wela GeeGee i su mama Renata.

Tulum tabata un dòlfein salú. Parti mainta e tabata aktivo, entusiasmá, sosialisando ku e entrenadónan i e otro dòlfeinnan. Su morto tabata lamentablemente un aksidente trágiko sigun George Kieffer ta splika. E veterinario Maurico Rivero, a konfirmá kousa di e morto despues di outopsia riba e kurpa sin bida di Tulum. Ku un herida na kabes manera esaki, lamentablemente tur esfuerso lo tabata enbano, maske nos tabata presente na momentu di e suseso.

E pèrdida di Tulum ta laga un bashí enorme George Kieffer ta informá. “E tabata un di e promé dòlfeinnan ku tabata saludá e entrenadó nan i e ta esun último ku ta keda pa despedí di nos despues di kada inter-akshon. Hamas nos lo lubidá su energia i entusiasmo.”