WILLEMSTAD - Kontinuando ku e investigashon di e kaso di aksidente fatal na Arubastraat ku a tuma lugá dia 24 di desèmber 2021, a resultá ku e víktima ku a fayesé den e kaso aki, un ratu promé tabata enbolbí den un kaso di tiramentu den área di Kintjan.

Na momentu di e aksidente e tabata wòrdu transportá den vehíkulo partikular pa C.M.C., pero ku a aksidentá despues riba e kaminda ku ta kondusí pa Arubastraat.

Riba òrdu di fiskal di Ministerio Públiko a konfiská e kurpa pa outopsia di lei.

E víktima a keda identifiká komo Jose Miguel Marte Peguero, nase dia 12 di ougùstùs 1995 na Repúblika Dominikana. Investigashon den e kaso ta kontinuá.

https://extra.cw/ainda-polis-no-por-revela-identidat-di-e-viktima-den-aksidente-fatal/