WILLEMSTAD.- Fiskal Dennaoui- Simons a pidi 48 luna di kual 12 kondishonal pa e hòmber N. Martina propietario di un kompania di kran.
Ayera el a presentá den sala di korte pa su kaso keda tratá. Martina ta keda akusá di a violá un dama chines doño di un “snèk bar” na Mahuma dia 20 di febrüari 2019.
E dama víktima tambe tabata den sala huntu ku e representante di “slachtoffer hulp”.
Na polis e dama a deklará, ku e hòmber lo a probechá di dje na momento ku e tabata fuma i inkonsiente.
E hòmber a penetr’é i a hasi sèks kuné den tur sentido di palabra kontra su boluntat. El a bisa ku e akusado a his’é benta riba kama dal’ e un òf mas bia den su kara, ranka su paña fo’i su kurpa.
Segun e dama, e tabata den snèk i tabata serando despues ku nan a kaba di dal algun drinks. E akusado a sali serka dje i a bis’é e ta bai Campo.
Dado momento el a mira algun yamada pèrdí di e hòmber i el a yam’e bèk.
E hòmber a bis’é e tin sòpi pe i pa habri e porta. Ora el a habri e porta, e hòmber no tabatin niun sòpi. E hòmber a bent’é riba kama, kuminsá sunchi, pero e no tabatin forsa mas pasó e tabata basta fuma.
El a kai i e hòmber a his’é benta riba kama kita su paña fo’i su kurpa i subi riba dje. El a pidi e hòmber pa no hasié pero e hòmber a sigui ku su akto. El a pidié pa yama su amigu, no pa hasi trio manera e akusado a deklará, pero pasó e tabata su amigu.
Segun e akusado ora el a bai e dama a bèl e pa bis’é bin bèk. El a bai bèk i e dama a habri porta pe i kuminsá sunchi kita su paña i a bis’é pa yama e amigu pa nan hasi trio, pero e amigu no a kue e telefòn.
Despues nan a sigui i el a bolbe pidié pa bèl e amigu pe, pero e no a haña esaki leuk i despues ku nan a kaba el a disidí di bai. El a deklará ku e dama a asta bai kue kondon den e parti dilanti di e snèk i el a hasi sèks kuné boluntariamente.
Polis a skucha e amigu ku a bisa bèrdat e dama a bèl e i e tabata tende ta grita yora den un forma histériko.
El a disidí di bai na e snèk pa wak kiko ta pasando.
Ora el a yega el a haña e dama di un manera desesperá histériko i tabata grita yora. E dama a bis’é ku e akusado a viol’é.
El a kont’é ku e hòmber a bis’é ku e tin sòpi pe, ora el a bai habri e porta el a kai abou di fuma i e akusado a kue his’é bent’é riba kama ranka su pañanan.
Polis ku a hasi e investigashon den e telefòn a duna di konosé ku nan a mira ku e anochi ei e akusado ta esun ku a purba bèl e dama vários bia promé ku el a hañ’é na liña.
Pero Martina a insistí ku ta e dama a bèl e promé.
Den e telefòn di e dama a mira tambe ku un minüt promé ku el a bèl e akusado dos bia el a bèl un amigu i despues a bèl e akusado.
Martina a ninga tur e akusashonnan ayera. El a bisa ku niun momento so el a bisa e dama nada di sòpi. El a ninga di a his’é benta riba kama. Martina a insistí ku tur kos a bai boluntariamente entre nan dos.
Miembro di slachtoffer hulp ku a representá e dama a bisa ku te awe e víktima ta na man di sikólogo. Segun e representante, e dama te ainda no por pasa riba e suseso.
El a purba bai China pa distraí su mente, pero ora el a regresá tur kos a bin bèk. El a bisa ku e tin hopi miedu i te ku awor no a konta su mayornan kiko a pasa. Su tata ta duana i ta karga arma i tin miedu ku kosnan por sali fo’i man
E akusado a bisa ku no ta fásil pe pasó e no ta un hende asin’ei. Dor di e kaso aki el a pèrdè hopi trabou.
Fiskal a haña e akusashon probá i a hasi demanda di 48 luna di kual 12 kondishonal i a pidi pa detené mes ora. Hues lo tuma desishon aki 3 siman.