WILLEMSTAD.- Klientenan ku ta para bebe dilanti di minimarketnan ta hinkando e doñonan den problema serio ku e Tim Multidisiplinario. Pasobra nan ta kore e riesgo di haña atvertensia i na sierto okashon asta ta sera e lugá.

E Tim Multidisiplinario formá pa UBW/KPC i MEO ta subi kaya tur dia i ta kontrolá tur establesimentu, garashi i asta konstrukshon. Manera ta konosí nos ta den “lockdown” i gran parti di establesimentunan ta será.

Atrobe e Tim a kontrolá den vários área riba nos isla. Manera ariba indiká, tur dia e Tim tin di kore ku klientenan ku ta kumpra kos den minimarket òf tokonan i para konsumí esei dilanti dje establesimentu. Segun e medidanan ku tin awor aki, no por para na minimarket òf tokonan i bebe bibida alkohóliko. Mester kumpra esaki, i bai kuné for di e sitio.

Na  Seru Fortunaweg, e Tim a atendé ku doño di un minimarket ku ta yena bòter. Tambe a indiká na e propietario ku kliente no por keda para konsumí nada na e sitio, mester kumpra bai.                                                               P’esei a duna atvertensia na e propietario.

Na dos minimarket riba FD Rooseveltweg mester a indiká na propietario ku kliente no por konsumí  na e sitio.

Un minimarket na Juan Hatoweg a risibí un but pa orario di sera. Tambe a sera e establesimentu pa motibu ku no tin indikashon pa mantené distansia sosial. Na momentu ku nan kumpli, nan por reanudá operashon.

Un sitio di benta di kuminda den Stenenkoraal a risibí un amonestashon pa permití kliente sinta na mesa.